Netflix ၏ Emily နှင့် Lupin ဇာတ်လမ်းများကြောင့် ပါရီမြို့တော်သို့ သွားရောက်သော ခရီးသွားပိုမို များပြားလာခဲ့သည်ဟု သိရသည်။
ပါရီသို့လာရောက်သော ပြည်ပခရီးသွား ငါးဦးတွင်လေးဦးသည် ပါရီတွင် ရိုက်ကူးထားသော ရုပ်ရှင် သို့မဟုတ် ရုပ်မြင်သံကြားဇာတ်လမ်းတွဲများကို ကြည့်ရှုပြီးနောက် အလည်လာရောက်လို စိတ်ဖြစ်ပေါ်ခဲ့သည်ဟု ပြင်သစ်၏ အမျိုးသားရုပ်ရှင်အဖွဲ့အစည်းက ပြောကြားခဲ့သည်။
ယင်းသည် ၂၀၁၈ ခုနှစ်က အစောပိုင်းလေ့လာချက်တွင် လေးပုံ သုံးပုံအထိ ရှိသည်ဟု ဆိုသည်။
လူ ၁၀ ဦး၌တစ်ဦးတွင် ရုပ်ရှင်များသည် ပြင်သစ်ကိုလာရောက် လည်ပတ်ရသည့် အဓိကအကြောင်း အရင်းဖြစ်ပြီး ၎င်းတို့ထဲမှ ထက်ဝက်ခန့်သည် Netflix ၏ဇာတ်လမ်းတွဲ “Emily in Paris ”(၃၈ ရာခိုင်နှုန်း)နှင့် “Lupin ”(၁၁ရာခိုင်နှုန်း) တို့ကို ကြည့်ရှုခဲ့ပြီးနောက် လာရောက်ခြင်း ဖြစ်သည်ဟုဆိုသည်။
ယင်းသုတေသနကို စျေးကွက်သုတေသနကုမ္ပဏီ Ifopက ပြင်သစ်အမျိုးသားရုပ်ရှင်စင်တာအတွက် ရည်ရွယ်၍ ဘယ်ဂျီယံ၊ စပိန်၊အမေရိကန်၊ ဗြိတိန်၊ ဂျာမနီနှင့်တရုတ်နိုင်ငံသားတို့အကြား စစ်တမ်းကောက်ယူ ခဲ့ခြင်းဖြစ်သည်။
ရုပ်ရှင်ခရီးသွားကဏ္ဍသည် အသစ်အဆန်းတစ်ရပ်မဟုတ်သည့်အပြင် streaming ဝန်ဆောင်မှုများ၏ ကြီးထွားလာမှုနှင့်အတူ ပါရီသို့ခရီးသွားများ အကန့်အသတ်မရှိ သွားရောက်ခဲ့ကြခြင်းဖြစ်သည်ဟု CNC ၏ သုတေသနအကြီးအကဲ ဆီစီလီလာကောက ပြောကြားခဲ့သည်။
“ဒါက ခရီးသွားကဏ္ဍကိုမြှင့်တင်ပြီး မြို့ရဲ့ဂုဏ်သတင်းကျော်ဇောမှုကို တိုးမြှင့်တဲ့နေရာမှာ စိတ်ဝင်စား ဖို့ကောင်းတဲ့ နည်းလမ်းတစ်ရပ်ဖြစ်ပါတယ်”ဟု ၎င်းကဆိုသည်။
ပါရီမြို့တော်တွင် ပြည်ပခရီးသွားနှစ်ဦး၌ တစ်ဦးသည် Lupin ကို ကြည့်ဖူးသူများ ဖြစ်သည်ဟု သိရသည်။ ၄၄ ရာခိုင်နှုန်းမှာမူ ပါရီ၏ဇိမ်ခံ ကမ္ဘာအတွင်း လမ်းပျောက်နေသော ငယ်ရွယ်သည့်အမေရိကန်အ မျိုးသမီးအကြောင်း ရိုက်ကူးထားသော Emily in Paris ”ကို ကြည့်ခဲ့ဖူးသည်ဟု ဆိုသည်။
Netflix က ထုတ်လုပ်သည့် ယင်းဇာတ်လမ်းတွဲနှစ်ခုသည် “Versailles”၊“Marie-Antoinette” နှင့်“ Dix pour Cent ”ကဲ့သို့ ပြင်သစ်ဇာတ်လမ်းတွဲစစ်စစ်များထက် ပိုမိုကျယ်ပြန့်စွာ ရေပန်းစားခဲ့သည်။
၈၆ ရာခိုင်နှုန်းသည် ပြင်သစ်ရုပ်ရှင် သို့မဟုတ် ဇာတ်လမ်းတွဲအချို့ကို ကြည့်ခဲ့ဖူးသူများဖြစ်ပြီး ၂၀၁၈ ခုနှစ်က ၈၁ ရာခိုင်နှုန်းအထိ ရှိခဲ့သည်ဟု လာကောက ဆိုသည်။
ခရီးသွားများ၏ ၄၁ ရာခိုင်နှုန်းသည် ပြင်သစ်ဟာသရုပ်ရှင့် “ The Intouchables ”ကို ကြည့်ရှုခဲ့ဖူးပြီး ၃၇ ရာခိုင်နှုန်းသည် “Amelie” ကို ကြည့်ရှုခဲ့ဖူးသည်ဟု ဆိုသည်။
သို့သော် ခရီးသွားအများအပြားသည် ပါရီတွင် ရိုက်ကူးခဲ့သော အမေရိကန်နာမည်ကျော်ရုပ်ရှင်များ ဖြစ်သည့်“ Di Vinci Code” ၊“Mission Impossible Fallout” သို့မဟုတ် “ The Devil Wears Prada” တို့ကို ကြည့်ရှုခဲ့ဖူးသည်ဟု ဆိုသည်။
