ယူကရိန်းတပ်ဖွဲ့များ၏ လက်နက်ကြီးများဖြင့် ပစ်ခတ်မှုတိုက်ခိုက်မှုများ အပြီးတွင် ယီလန်နာဂိုကိုဗာ အမည်ရှိ အမျိုးသမီးတစ်ဦးသည် အသက် ၁၀ နှစ် အရွယ် ကလေးနှင့်အတူ ဘေးလွတ်ရာ ရွှေ့ပြောင်းခံခဲ့ ရပြီးနောက် ရုရှားနိုင်ငံနယ်စပ်မြို့ဖြစ်သည့် ဘယ်ဂိုရော့မြို့၏ ရထားဘူတာရုံသို့ ရောက်ရှိလာခဲ့့သည်။
အသက် ၃၇ နှစ်အရွယ် ဂိုကိုဗာသည် နယ်စပ်ဒေသနှင့်ဝေးသည့် ကလေးသူများ စောင့်ရှောက်ရေး စခန်းများသို့ ပို့ဆောင်ရန် အာဏာပိုင်များ၏ ကမ်းလှမ်းချက်ကိုသဘောတူခဲ့သည့် ရာနှင့်ချီသည့် မိဘများထဲတွင် တစ်ဦးအပါအဝင်ဖြစ်သည်။ ထိုမိဘများသည် ၎င်းတို့၏ ကလေးများကို လိုက်ပါစောင့်ရှောက်ခဲ့ခြင်းဖြစ်သည်။
ရုရှားက ယူကရိန်းကို ဝင်ရောက်တိုက်ခိုက်ခဲ့ပြီးနောက် ယခုဖြစ်စဉ်သည် ရုရှားမြေပေါ်တွင် အကြီးမားဆုံး အရပ်သားများ ရွှေ့ပြောင်းမှုထဲတွင် တစ်ခုအပါအဝင် ဖြစ်သည်။
“ကျွန်မတို့က ကလေးတွေအတွက် အရမ်းစိုးရိမ်နေကြပါတယ်”ဟု ဂိုကိုဗာက အေအက်ဖ်ပီသတင်းဌာနကို ပြောကြားခဲ့သည်။
ယူကရိန်းသည် ဘယ်လ်ဂိုရော့ မြို့ကို လပေါင်းများစွာကြာ တိုက်ခိုက်ခဲ့သော်လည်း ပြီးခဲ့သည့် သီ တင်းနှစ်ပတ်အတွင်း တိုက်ခိုက်မှုများ ပိုမိုပြင်းထန်လာခဲ့သည်။
ဒီဇင်ဘာ ၃၀ ရက်က လူ ၂၅ ဦး သေဆုံးခဲ့သည့် ယူကရိန်း၏ တိုက်ခိုက်မှုအပြီးတွင် ဂိုကိုဗာသည် ၎င်း၏ သားဖြစ်သူကို ဘေးလွတ်ရာ ပို့ဆောင်ရန် ဆုံးဖြတ်ခဲ့ခြင်းဖြစ်သည်။
“ကျွန်မတို့ဟာ ကလေးတွေအတွက် မစိုးရိမ်ချင်တာကြောင့် ကလေးသူငယ်စောင့်ရှောက်ရေး စခန်းတွေကို ပို့ဆောင်ဖို့ ဆုံးဖြတ်ခဲ့တာဖြစ်ပါတယ်”ဟု ဂိုကိုဗာက ပြောသည်။ သူ့သားသည် မော်စကိုမြို့တော်အနီးရှိ ကာလူဂါဒေသတွင် ဖွင့်ထားသည့် ကလေးစောင့်ရှောက်ရေးစခန်းသို့ သွားရောက်ရမည်ဖြစ်သည်။
“ကလေးတွေဟာ သေနတ်သံတွေကို အရမ်းကြောက်လန့်နေပါတယ်။ ဒါဟာ အရမ်းစိုးရိမ်စရာ ကောင်းပါတယ်”ဟု ၎င်းက ဆိုသည်။
လာမည့် ၂၁ ရက်အတွင်း ကလေးသူငယ်ပေါင်း ၃၉၂ ဦးသည် ဗိုရိုနက်ဇ်နှင့် ကာလူဂါဒေသများတွင် ရှိသည့် ကျန်းမာရေးစခန်းများသို့ သွားရောက်လိမ့်မည်ဟု ဘယ်လ်ဂိုရော့မြို့တော်ဝန် ဗလန်တင်က ပြောသည်။
ဂိုကိုဗာက သူ့သား၏ ကျောင်းသည် အာဏာပိုင်များနှင့်အတူ ဘေးလွတ်ရာရွှေ့ပြောင်းပေးမည့် အစီအစဉ်ကို လုပ်ဆောင်ခဲ့ခြင်းဖြစ်သော်လည်း ကလေးအများစုသည် ၎င်းတို့၏ မိဘများနှင့် ခွဲခွာလိုသည့် ဆန္ဒမရှိကြောင်း ပြောကြားခဲ့သည်။
မူကြိုတက်ရမည့် အရွယ်သားတစ်ဦးရှိသည့် မူလတန်းပြဆရာမ ယက်ဗ်ဂျီနီယာ ဆဗန်ကိုက သူသည် စိုးရိမ်နေသော်လည်း ရွေးချယ်စရာမရှိကြောင်း ပြောကြားခဲ့သည်။
“ကျွန်မတို့အားလုံး ကလေးတွေဘေးလွတ်ရာ ရွှေ့ပြောင်းဖို့နဲ့ ပတ်သက်ပြီး သိထားပါတယ်။ ဒါမှ မဟုတ်ရင် ဘယ်ကိုသွားရမလဲဆိုတာ ကျွန်မတို့မသိပါဘူး”ဟု ၎င်းက ပြောကြားခဲ့သည်။
“အိမ်မှာပဲဖြစ်ဖြစ်၊ နီးစပ်ရာမြို့မှာပဲ ဖြစ်ဖြစ် ဘယ်နေရာမှာမဆို ဖြစ်သွားနိုင်ပါတယ်။ ဘယ်နေရာမှ မလုံခြုံပါဘူး”ဟု ဆဗန်ကိုက ပြောကြားခဲ့သည်။
၎င်းတို့မိသားစုသည် ထိတ်လန့်ကြောက်ရွံ့စွာ နေထိုင်နေရကြောင်း၊ အကြောက်တရားသည် နေရာတိုင်းတွင်ရှိကြောင်း ဆဗန်ကိုက ဆိုသည်။
ယူကရိန်း၏ လက်နက်ကြီးများဖြင့် ပစ်ခတ်မှုကို ရပ်တန့်ရန် လိုအပ်သမျှအရာအားလုံး လုပ်ဆောင်မည်ဟု ကရင်မလင်က ပြောကြားခဲ့ပြီးနောက် တစ်ရက်အကြာတွင် ဘေးလွတ်ရာ ရွှေ့ပြောင်းသည့်အစီအစဉ် စတင်ခဲ့ခြင်းဖြစ်သည်။
သို့သော်လည်း ရုရှားမြေပေါ်တွင် လူအများအပြားကို ၎င်းတို့၏ နေအိမ်များအတွင်းမှ ရွှေ့ပြောင်းမှုသည် ရုရှားအစိုးရအတွက် ထိုးနှက်ချက်တစ်ခုဖြစ်နေသည်။
အဘယ်ကြောင့်ဆိုသော် ရုရှားသမ္မတ ဗလာဒီမာပူတင်သည် ရွေးကောက်ပွဲတွင် ဝင်ရောက်မယှဉ်ပြိုင် မီအချိန်တွင် ရုရှားနိုင်ငံအတွင်း ပုံမှန်အနေအထားရှိနေသည့် အခြေအနေကို ထိန်းသိမ်းရန် ကြိုးပမ်းနေ ခြင်းကြောင့်ဖြစ်သည်။
ယူကရိန်း၏ ဒီဇင်ဘာ ၃၀ ရက် တိုက်ခိုက်မှုအပြီးတွင် ရုရှား၏ နယ်စပ်ဒေသအနီးရှိ စာသင်ကျောင်းများကို ဆောင်ရာသီ အားလပ်ရက်ကာလထက်ကျော်လွန်ပြီး ပိတ်ထားရန် အာဏာပိုင်များက ညွှန်ကြားချက် ထုတ်ပြန်ခဲ့သည်။
