၂၀၂၃ ခုနှစ်အတွင်း ဆံတော်ရှင်ကျိုက်ထီးရိုးစေတီတော်မြတ်ကြီးတည်ရှိရာ ကျိုက်ထီးရိုးဒေသသို့ ပြည်တွင်း ပြည်ပ ဘုရားဖူးခရီးသွား သုံးသိန်းနီးပါးလာရောက်ခဲ့ကြောင်း ဘဏ္ဍာတော်ထိန်းဂေါပကအဖွဲ့ထံမှ သိရသည်။
၂၀၂၃ ခုနှစ် ဇန်နဝါရီလအတွင်းက ပြည်တွင်းဘုရားဖူး ၃၇၃၃၂ ဦး၊ ပြည်ပဘုရားဖူးခရီးသွား ၄၄၅ ဦး၊ ဖေဖော်ဝါရီလအတွင်းက ပြည်တွင်းဘုရားဖူး ၁၈၅၀၉ ဦး၊ ပြည်ပဘုရားဖူးခရီးသွား ၈၃၃ ဦး၊ မတ်လအတွင်းက ပြည်တွင်းဘုရားဖူး ၃၅၈၄၁ ဦး၊ ပြည်ပဘုရားဖူးခရီးသွား ၇၈၈ ဦး၊ ဧပြီလအတွင်းက ပြည်တွင်းဘုရားဖူး ၃၈၅၇၂ ဦး၊ ပြည်ပဘုရားဖူးခရီးသွား ၅၉၄ ဦး၊ မေလအတွင်းက ပြည်တွင်းဘုရားဖူး ၂၁၃၃၆ ဦး၊ ပြည်ပဘုရားဖူးခရီးသွား ၁၀၅၈ ဦး၊ ဇွန်လအတွင်းက ပြည်တွင်းဘုရားဖူး ၅၉၈၄ ဦး၊ ပြည်ပဘုရားဖူးခရီးသွား ၉၂၀ ဦး လာရောက်ခဲ့ကြောင်း သိရသည်။
ထို့အတူ ၂၀၂၃ ခုနှစ် ဇူလိုင်လအတွင်းက ပြည်တွင်းဘုရားဖူး ၂၄၃၀ ဦး၊ ပြည်ပဘုရားဖူးခရီးသွား ၇၀၁ ဦး၊ သြဂုတ်လအတွင်းက ပြည်တွင်းဘုရားဖူး ၁၈၆၃ ဦး၊ ပြည်ပဘုရားဖူးခရီးသွား ၇၆၃ ဦး၊ စက်တင်ဘာလအတွင်းက ပြည်တွင်းဘုရားဖူး ၂၇၁၉ ဦး၊ ပြည်ပဘုရားဖူးခရီးသွား ၇၈၄ ဦး၊ အောက်တိုဘာလအတွင်းက ပြည်တွင်းဘုရားဖူး ၃၀၄၁၃ ဦး၊ ပြည်ပဘုရားဖူးခရီးသွား ၁၁၉၄ ဦး၊ နိုဝင်ဘာလအတွင်းက ပြည်တွင်းဘုရားဖူး ၂၄၉၇၅ ဦး၊ ပြည်ပဘုရားဖူးခရီးသွား ၈၅၀ ဦးနှင့် ဒီဇင်ဘာလအတွင်းက ပြည်တွင်းဘုရားဖူး ၆၄၁၀၅ ဦး၊ ပြည်ပဘုရားဖူးခရီးသွား ၁၂၈၄ ဦး လာရောက်ခဲ့ပြီး စုစုပေါင်းပြည်တွင်းဘုရားဖူး ၂၈၄၀၇၉ ဦး၊ ပြည်ပဘုရားဖူးခရီးသွား ၁၀၂၁၄ ဦး လာရောက်ခဲ့ကြောင်း ဘဏ္ဍာတော်ထိန်းဂေါပကအဖွဲ့ထံမှ သိရသည်။
ပြီးခဲ့သည့် ၂၀၂၃ ခုနှစ် ဒီဇင်ဘာလအတွင်းက ကျိုက်ထီးရိုးဒေသသို့ ဘုရားဖူးအများ အပြားလာရောက်ခဲ့ကြောင်း ဘဏ္ဍာတော်ထိန်းဂေါပကအဖွဲ့ဝင်တစ်ဦးက ပြောကြားသည်။
၎င်းက ဆက်လက်ပြီး “ဒီဇင်ဘာလအတွင်းမှာက ခရစ္စမတ်ကာလ၊ New Year ကာလ ကျောင်းပိတ်ရက်၊ ရုံးပိတ်ရက်၊ အလုပ်ပိတ်ရက်တွေများတော့ ဘုရားဖူးအတော်များများလာကြတယ်။ အဲဒီအပြင် ဇန်နဝါရီ ၁ ရက် မှာလည်း ဆီမီး ၉၀၀၀ ပူဇော်ပွဲပြုလုပ်တော့ ဘုရားဖူးတွေမပြတ်ဘူး။ ကိုဗစ်ကာလနောက်ပိုင်းမှာ အများဆုံးလာရောက်ကြတာလို့ ဆိုလို့ရပါတယ်” ဟု ပြောကြားသည်။
ကျိုက်ထီးရိုးဒေသအတွင်း ဘုရားဖူးများ ပြန်လည်ဝင်ရောက်လာသည့်အတွက်ကြောင့် စားသောက်ဆိုင်လုပ်ငန်းများ၊ တည်းခိုရေးလုပ်ငန်းများနှင့် အထမ်းသမားများအနေဖြင့် အထိုက်အလျောက်အဆင်ပြေမှုရှိခဲ့ကြောင်း သိရသည်။
“အစောပိုင်းကာလတွေက ဘုရားဖူးအရမ်းနည်းတော့ အဆင်မပြေဘူး။ တချို့လတွေဆို စရိတ်မကျေဘူး။ ဒီနှစ်တောင် ဖွင့်ပွဲပြီးတော့မှ ဘုရားဖူးနည်းနည်းပြန်ကျလာတယ်။ ဒီဇင်ဘာလပိတ်ရက်တွေမှာ ဘုရားဖူးတွေပြန် ဝင်လာကြတယ်။ အဲဒီအတွက် အတန်အသင့်တော့ ပြေလည်တယ်။ စားသောက်ဆိုင်လုပ်ငန်းတွေက ဘုရားဖူးတွေကိုပဲ မှီပြီးလုပ်ကြရတာလေ” ဟု ကျိုက်ထီးရိုးတောင်ပေါ်ရှိ စားသောက်ဆိုင်လုပ်ငန်းလုပ်ကိုင်နေသူတစ်ဦးက ပြောကြားသည်။
