မြန်မာနိုင်ငံ လူဦးရေ သုံးပုံတပုံ သို့မဟုတ် လူ ၁၈ သန်းကျော်သည် လူသားချင်းစာနာမှု အကူအညီ လိုအပ်နေသည်ဟု ကုလသမဂ္ဂက ဒီဇင်ဘာ ၁၈ ရက်နေ့တွင် သတိပေးလိုက်ပြီး ထိုလိုအပ်ချက်အတွက် ၂၀၂၄ ခုနှစ်တွင် ဒေါ်လာ ၁ ဘီလီယံ အလှူငွေ တောင်းခံသည်။
မြန်မာနိုင်ငံတွင် လွန်ခဲ့သော သုံးနှစ်နီးပါး ၂၀၂၁ ခုနှစ်၊ ဖေဖော်ဝါရီလက အာဏာသိမ်းပြီးနောက် လူသားချင်းစာနာမှု အခြေအနေ ဆိုးရွားလာကြောင်း ကုလသမဂ္ဂက ဖော်ပြသည်။
“၂၀၂၁ ခုနှစ်၊ ဖေဖော်ဝါရီလတွင် အာဏာသိမ်းပြီးနောက် အရပ်သားများသည် အကြောက်တရားဖြင့် နေထိုင်ရပြီး ပိုမိုနက်ရှိုင်းလာသည့် လူသားချင်းစာနာမှု အကျပ်အတည်းဖြင့် မြန်မာသည် ၂၀၂၄ ခုနှစ်တွင် ချောက်ကမ်းပါးထိပ်တွင် ရှိနေသည်” ဟု ကုလသမဂ္ဂ လူသားချင်း စာနာထောက်ထားမှုဆိုင်ရာ ညှိနှိုင်းရေးရုံး (UNOCHA) က ဒီဇင်ဘာလ ၁၈ ရက်နေ့တွင် ထုတ်ပြန်သည့် အစီရင်ခံစာတွင် ဖော်ပြသည်။
လတ်တလော လူသားချင်းစာနာမှု အကူအညီ လိုအပ်နေသူ ၁၈ ဒသမ ၆ သန်းဆိုသည့် အရေအတွက်သည် ယခင်တနှစ်ကထက် ၁ သန်း ပိုမိုများပြားလာပြီး အာဏာမသိမ်းမီ ၂၀၂၀ ပြည့်နှစ်ကထက် ၁၉ ဆ ပိုမိုများလာသည်။
“နေရပ်စွန့်ခွာရခြင်း၊ ကျန်းမာရေးစောင့်ရှောက်မှုနှင့် ပညာရေးအဆက်ပြတ်ခြင်း၊ အစားအစာ မလုံလောက်ခြင်း၊ အာဟာရချို့တဲ့ခြင်းနှင့် အတင်းအကျပ် စစ်သားစုဆောင်းခြင်းနှင့် စိတ်ဖိစီးမှု အပါအဝင် အကာအကွယ် ကင်းမဲ့ခြင်းများကြောင့် ကလေးငယ်များသည် အကျပ်အတည်း၏ဒဏ်ကို အဆိုးရွားဆုံးခံရသည်” ဟု မြန်မာဆိုင်ရာ လူသားချင်းစာနာမှု ယာယီညှိနှိုင်းရေးမှူး မစ္စတာ မာကိုလွီဂီ ကော်စီက သတိပေးသည်။
ထိုအစီရင်ခံစာတွင် အောက်တိုဘာလ နှောင်းပိုင်းက နိုင်ငံမြောက်ပိုင်းတွင် မြန်မာစစ်တပ်နှင့် တိုင်းရင်းသားလက်နက်ကိုင်များ တိုက်ပွဲဖြစ်ပွားပြီး နေရပ်စွန့်ခွာထွက်ပြေးရသူ ၆၆၀,၀၀၀ ဦးကျော် အပါအဝင် ဒီဇင်ဘာလ ၁၁ ရက်နေ့အထိ နေအိမ်စွန့်ခွာထွက်ပြေးနေရသူ ၂ ဒသမ ၆ သန်း ရှိသည့် အစုလိုက်အပြုံလိုက် နေရပ်စွန့်ခွာ ထွက်ပြေးနေသူများအတွက် အထူးစိုးရိမ်ကြောင်း ဖော်ပြထားသည်။ ထိုအရေအတွက်သည် ၂၀၂၂ ခုနှစ် အလားတူ ကာလကထက် ၁ ဒဿမ ၁ သန်း ပိုမိုများပြားသည်။
အခြေအနေကို ပိုမိုဆိုးရွားစေသည်မှာ ပဋိပက္ခနှင့် အကြမ်းဖက်မှုသည် ၂၀၂၄ ခုနှစ်တွင် ပိုမိုပြင်းထန်မည်ဟု မျှော်လင့်ရခြင်းဖြစ်ကြောင်း ထိုအစီရင်ခံစာက ဖော်ပြပြီး စစ်တပ်က အရပ်သားများကို စနစ်တကျ အကြမ်းဖက်ခြင်းကို ရှုတ်ချသည်။
ထိုသို့ ဆိုးရွားသော အခြေအနေများကြောင့် ၂၀၂၄ ခုနှစ်တွင် မြန်မာမှ ဦးစားပေးအဖြစ် သတ်မှတ်ထားသူ ၅ ဒသမ ၃ သန်းကို ကူညီရန် OCHA က ဒီဇင်ဘာလ ၁၈ ရက်နေ့တွင် အလှူငွေ အမေရိကန်ဒေါ်လာ ၉၉၄ သန်း တောင်းခံသည်။
၂၀၂၃ ခုနှစ်တွင် ဖြစ်ပေါ်ခဲ့သည့် ရန်ပုံငွေ မလုံလောက်ခြင်းမျိုး ထပ်မံဖြစ်ပေါ်မည်ကို မိမိတို့ အဖြစ်မခံနိုင်ကြောင်း မစ္စတာ ကော်စီက ဖော်ပြပြီး ထိုစဉ်က လိုအပ်သော ရန်ပုံငွေ၏ ၂၉ ရာခိုင်နှုန်းသာရရှိပြီး ဦးစားပေး သတ်မှတ်ထားသူ ၁ ဒသမ ၉ သန်းအတွက် အကူအညီမရခဲ့ကြောင်း ဆက်လက်ပြောကြားသည်။
ကုလသမဂ္ဂ၏ နိုင်ငံတကာအစီအစဉ်များအတွက် ရန်ပုံငွေလျော့ကျနေသော်လည်း “သန်းပေါင်းများစွာသော အသက်များ အန္တရယ်ကျရောက်နေပြီး မြန်မာနိုင်ငံသည် မေ့ပျောက်နေသည့် အရေးပေါ်အခြေအနေ ဖြစ်မလာစေရန် မိမိတို့ တတ်နိုင်သမျှ အရာရာကို လုပ်ဆောင်ရမည်” ဟု ၎င်းက ဆက်လက်ပြောကြားသည်။
