လွန်ခဲ့သောလတွင် ကယား (ကရင်နီ) ပြည်နယ် မြို့တော်လွိုင်ကော်ကို သိမ်းပိုက်ရန် တိုက်ပွဲများ ဖြစ်ပွားသောကြောင့် ထွက်ပြေးသည့် ဒေသခံများ ချန်ထားခဲ့သည့် အိမ်မွေးတိရစ္ဆာန်များသည် အစားအသောက်နှင့် ဆက်လက်ရှင်သန်ရေးအတွက် စေတနာ့ဝန်ထမ်းများကို မှီခိုနေရသည်။
သို့သော် လွိုင်ကော်ရှိ ရပ်ကွက် ၁၃ ခုအနက် အချို့သည် ဝင်ရောက်ရန် အလွန် အန္တရာယ်များသောကြောင့် ၎င်းတို့အနေဖြင့် အကန့်အသတ်ဖြင့်သာ လုပ်နိုင်ကြောင်းနှင့် ၎င်းတို့ကိုယ်တိုင်လည်း နောက်ဆုံးတွင် ထွက်ပြေးသူများနောက်သို့ လိုက်ရနိုင်ကြောင်း စေတနာ့ ဝန်ထမ်းများက ပြောသည်။
ကိုမြတ်နှင့် သူ၏ဇနီးတို့သည် ၎င်းတို့ အိမ်ရှေ့သို့ ခွေးများ စတင်ရောက်လာသည့် လွန်ခဲ့သောလလယ်မှ စတင်ပြီး လူမနေတော့သည့် အိမ်များမှ ခွေးများ၊ ကြောင်များကို စတင် အစာကျွေးခဲ့သည်။
“ကျနော်တို့အိမ်က ခွေး ငါးကောင်ကို အစာကျွေးဖို့ ပြင်ဆင်တော့ ရပ်ကွက်ထဲက တခြားခွေးတွေ အိမ်ရှေ့ကို ရောက်လာတယ်။ ကျနော်တို့က သူတို့ကို သနားပြီး အခု ကျနော်နဲ့ ကျနော့်ဇနီးက တခြား ရပ်ကွက်က ခွေးတွေ ကြောင်တွေကိုလည်း နေ့တိုင်းအစာကျွေးနေတယ်” ဟု ကိုမြတ်က ရှင်းပြသည်။
၎င်းတို့၏ ရပ်ကွက်ဖြစ်သော နန့်ပေါ်ဝန် ရပ်ကွက်သည် တိုက်ပွဲဖြစ်သည့်နေရာနှင့် အနည်းငယ်ဝေးပြီး အခြားနေရာများနှင့် ယှဉ်လျှင် ငြိမ်းချမ်းသောကြောင့် သူနှင့် သူ့ဇနီး မသူ တို့သည် အိမ်တွင် ဆက်လက် နေထိုင်နေခြင်း ဖြစ်သည်။
မဟာမိတ် တော်လှန်ရေးတပ်များက ၁၁၁၁ စစ်ဆင်ရေးကို နိုဝင်ဘာလ ၁၁ ရက်နေ့တွင် စတင်သောအခါ လွိုင်ကော်တွင် တိုက်ပွဲများ ဖြစ်ပွားသည်။ ၎င်းတို့သည် ကယား (ကရင်နီ) ပြည်နယ် အရှေ့ပိုင်း၊ ရှမ်းပြည်နယ် တောင်ပိုင်းနှင့် လွိုင်ကော်မှ စစ်တပ်စခန်းများကို တိုက်ခိုက်ခြင်းဖြင့် စစ်ဆင်ရေး စတင်သည်။
စစ်ကောင်စီတပ်များက ၎င်းတို့ နေအိမ်များကို လေကြောင်းတိုက်ခိုက်မှုနှင့် အမြောက်ဖြင့် ပစ်ခတ်မှုများ ပြူလုပ်သောကြောင့် လွိုင်ကော်မှ ဒေသခံထောင်ပေါင်းများစွာ ထွက်ပြေးကြသည်။ ဒေသခံအချို့သည် ၎င်းတို့၏ အိမ်မွေးတိရစ္ဆာန်များကို ခေါ်ဆောင်သွားကြသော်လည်း အချို့က အိမ်မွေးတိရစ္ဆာန်များကို နေအိမ်များတွင်ပင် ထားခဲ့ကြသည်။
၎င်းတို့သည် တနေ့လျှင် ရပ်ကွက် လေးခုမှ ခွေးနှင့်ကြောင် ၃၀ ခန့်ကို အစာကျွေးကြောင်း ကိုမြတ်နှင့် မသူက ဧရာဝတီသတင်းဌာနသို့ ပြောသည်။ ကျန်ရစ်ခဲ့သည့် အိမ်မွေးတိရိစ္ဆာန်များကို ၎င်းတို့ အစာကျွေးသည့် သတင်းများ အွန်လိုင်းတွင် ပျံ့နှံ့လာသောအခါ လွိုင်ကော်မှ ထွက်ပြေးသွားသည့် အခြားသူများက ၎င်းတို့ချန်ထားခဲ့သည့် အိမ်မွေး တိရိစ္ဆာန်များကို အစာကျွေးပေးရန် မေတ္တာရပ်ခံလာကြသည်။
သို့သော် အချို့ အိမ်မွေးတိရိစ္ဆာန်များသည် စစ်မြေပြင်ဖြစ်နေသည့် ရပ်ကွက်များမှ ဖြစ်သောကြောင့် အကူအညီမပေးနိုင် ဖြစ်နေသည်။
မူလက ကိုမြတ်နှင့် မသူတို့သည် တိရိစ္ဆာန်အစားအစာ ဝယ်ရန် ၎င်းတို့ငွေကို သုံးရသော်လည်း ငွေကြေးလှူဒါန်းသည့် စေတနာရှင်များ မကြာမီ ပေါ်ပေါက်လာသည်။
ဒေါ်အုခူ၊ နောင်ယား၊ နာနတ်တော၊ မိန်းလွန်နှင့် နန့်ကွက် အပါအဝင် အချို့ရပ်ကွက်များတွင် တော်လှန်ရေးတပ်များနှင့် စစ်ကောင်စီတပ်များအကြား တိုက်ပွဲပြင်းထန်နေသောကြောင့် မသွားရောက်နိုင်ပေ။
ကိုမြတ်နှင့် မသူတို့သည် တခါတရံ အချို့ရပ်ကွက်များသို့ မဝင်ရောက်နိုင်ဘဲ ပြန်လာခဲ့ရသည်လည်း ရှိသည်။
“မနေ့က သေနတ်သံတွေကြားလို့ ပြန်ပြေးလာရတယ်” ဟု မသူက ဧရာဝတီသတင်းဌာနသို့ ဒီဇင်ဘာလ ၅ ရက်နေ့တွင် ပြောသည်။
အချို့ကြောင်များနှင့် ခွေးများသည် အိမ်များအတွင်း ပိတ်မိနေပြီး အစာမစားရသောကြောင့် ပိန်ချုံးနေကြောင်း အခြား စေတနာ့ဝန်ထမ်းတဦးဖြစ်သူ ကိုဝေကြီးက ဧရာဝတီသတင်းဌာနသို့ ပြောသည်။
သူနှင့် သူ့ဇနီးတို့သည် ကြောင်များနှင့် ခွေးများကို နိုဝင်ဘာလ ၁၉ ရက်နေ့တွင် စတင် အစာကျွေးပြီး ယခုအခါ ဒေါမမ၊ နန့်ပေါ်ဝန်၊ ပြည်သာယာနှင့် မင်္ဂလာရပ်ကွက်များမှ အိမ်မွေးတိရိစ္ဆာန် ၄၀ ခန့်ကို အစာကျွေးနေသည်။
အစာကျွေးပေးရန် မေတ္တာရပ်ခံထားသည့် အချို့ရပ်ကွက်များသို့ မသွားရဲကြောင်း ကိုဝေကြီးပြောပြီး “အဲဒီ အိမ်မွေးတိရစ္ဆာန်တွေ အခြေအနေကောင်းမယ်လို့ ကျနော် မထင်ဘူး” ဟု သူက ပြောသည်။
သူနှင့် သူ့ဇနီးတို့ ထို အိမ်မွေးတိရစ္ဆာန်များကို မည်မျှကြာအောင် အစာကျွေးနိုင်မည် ထင်သနည်းဟု မေးသောအခါ ကိုဝေကြီးက သေသေချာချာ မပြောနိုင်ကြောင်းပြောသည်။ တိုက်ပွဲများ ပိုမိုပြင်းထန် လာပါက သူနှင့် သူ့ဇနီးလည်း ထွက်ပြေးရနိုင်ကြောင်း ရှင်းပြသည်။
“ကျနော်တို့ လွိုင်ကော်မှာ ရှိနေသမျှတော့ သူတို့ကို အစာဆက်ကျွေးရမှာပဲ” ဟု ၎င်းကပြောသည်။
