Author: admin

NBA နာမည်ကြီးဘက်စကတ်ဘောသမား လီဘရွန်ဂျိမ်းစ်က ၎င်းအနေဖြင့် ကစားသမားဘဝမှ အနားယူရန် တဖြည်းဖြည်းနီးကပ်လာပြီဖြစ်ကြောင်း ပြောကြားခဲ့သည်။ LA Lakers အသင်းမှ လီဘရွန်ဂျိမ်းစ် သည် ဘရွတ်ကလင်းနက်စ်အသင်းအား (၁၁၆-၁၀၄)မှတ်ဖြင့် အနိုင်ယူခဲ့သည့်ပွဲတွင် အသင်းအတွက် ရမှတ်ပေါင်း ၄၀ မှတ်အထိ ရယူပေးပြီးနောက် ယင်းကဲ့သို့ ဖွင့်ဟခဲ့ခြင်း ဖြစ်သည်။ “သိပ်မကြာတော့ပါဘူး။ နောက်ထပ်လည်း ၂၁ နှစ်ကြာအောင် ကျွန်တော် မကစားတော့ပါဘူး။ ဒါက ဖြစ်လာမှာ အသေအချာပါပဲ။ ဘယ်အချိန်မှာ တံခါးပိတ်ရမယ်ဆိုတာ ကျွန်တော် မသိပါဘူး။ ဒါပေမဲ့ အချိန်များများစားစား မကျန်တော့ပါဘူး”ဟု လီဘ ရွန်ဂျိမ်းစ်က ပွဲအပြီးတွင် သတင်းထောက်များသို့ ပြောကြားခဲ့သည်။ အသက် ၃၉ နှစ်ရှိပြီ ဖြစ်သည့် လီဘရွန်ဂျိမ်းစ်က ၂၀၀၃ ခုနှစ်က တည်းက NBA ပြိုင်ပွဲတွင် စတင်ကစားခဲ့ခြင်း ဖြစ်ပြီး ဘရွတ်ကလင်းနက်စ်အသင်းအား အနိုင်ရသည့်ပွဲတွင် Three Pointers ကိုးကြိမ် ရယူခဲ့ကာ သူ၏ကစားသမားသက်တမ်းတစ်လျှောက် ပွဲတစ်ပွဲအတွင်း အများဆုံးစံချိန်ကို ထပ်မံလိုက်မီခဲ့သည်။ လီဘရွန်ဂျိမ်းစ်အနေဖြင့် ယခုပွဲမှာ ကစားသမားဘဝ ၁၄၈၅ ပွဲ မြောက်ဖြစ်ပြီး ယခုရာသီတွင် ပွဲစဉ်တစ်ပွဲအတွင်း ရမှတ် ၄၀ အထိ ရယူနိုင်မှုမှာ တတိယအကြိမ်မြောက်ဖြစ်ကာ နောက်ဆုံးမှာ ပြီးခဲ့သည့် မတ်လ ၁၆ ရက်က ဂိုးလ်ဒင်းစတိတ်ဝါရီယာစ်အသင်းအား အရေးနိမ့်ခဲ့သည့်ပွဲတွင် ရရှိထားခြင်းလည်း ဖြစ်သည်။ LA Lakers အသင်းသည် ယင်းပွဲပြီးကတည်းက ကစားခဲ့သည့် အမှတ်ပေးပွဲစဉ် ခြောက်ပွဲတွင် ငါးပွဲ အထိ အနိုင်ရခဲ့ပြီး အနောက်ပိုင်းဇုန်တွင်…

အိန္ဒိယအတိုက်အခံပါတီများဖြင့် ဖွဲ့စည်းထားသည့် မဟာမိတ်အုပ်စုသည် မတ်လ ၃၁ ရက်က ၎င်းတို့၏ ရွေးကောက်ပွဲမဲဆွယ်စည်းရုံးမှုများကို စတင်ခဲ့ပြီး စုဝေးဆန္ဒပြပွဲကြီးတစ်ခု စီစဉ်ပြုလုပ်ကာ ဧပြီလတွင်ကျင်းပမည့် အထွေထွေရွေးကောက်ပွဲမတိုင်မီဝန်ကြီးချုပ်နရင်ဒရာမိုဒီ၏ အစိုးရသည် အတိုက်အခံများ ကို ဖိနှိပ်နေပြီး ဒီမိုကရေစီစနစ်ကို မှေးမှိန်အောင် လုပ်နေသည်ဟု ဝေဖန်ပြစ်တင်ခဲ့သည်။ မြို့တော်နယူးဒေလီတွင် ပြုလုပ်ခဲ့သည့် Save Democracy ဟုအမည်ပေးထားသော လူထုစုဝေးပွဲသည် INDIA ဟုအမည်ရသည့် အတိုက်အခံအုပ်စုက ပထမဆုံးအကြိမ်အဖြစ် ထင်ထင်ရှားရှားအင်အားပြမှုဖြစ်သည်။ ဝန် ကြီးချုပ်မိုဒီသည်လည်း ဧပြီ ၃၁ ရက်က တရားဝင် မဲဆွယ်စည်းရုံးမှုများကို စတင်ပြုလုပ်ခဲ့ကြောင်း သိရသည်။ သီတင်းပတ်ခြောက်ပတ်ကြာ ကျင်းပမည့် အိန္ဒိိယ အထွေထွေရွေးကောက်ပွဲကို ဧပြီ ၁၉ ရက်မှစတင်ကာ ဇွန် ၁ ရက်အထိ အဆင့်ခုနစ်ဆင့်ဖြင့် ကျင်းပမည်ဖြစ်ကြောင်း အာဏာပိုင်များက ကြေညာထားသည်။ ဝန်ကြီးချုပ် နရင်ဒရာမိုဒီနှင့် သူ၏ဟိန္ဒူအမျိုးသားရေးဝါဒီ ဘာရာတီယာ ဂျာနာတာပါတီက ထပ်မံအနိုင်ရရှိမည်ဟု လူထုစစ်တမ်းအများစုတွင် ရေပန်းစားလျက်ရှိသည်။ အဆိုပါရွေးကောက်ပွဲတွင် မဲပေးခွင့်ရှိသူ သန်းတစ်ထောင်နီးပါးရှိသည့်အတွက် ကမ္ဘာ့အကြီးဆုံးရွေးကောက်ပွဲဟု ဆိုရမည်ဖြစ်သည်။ ထိုရွေးကောက်ပွဲတွင် သက်တမ်းနှစ်ကြိမ်ဆက် ဝန်ကြီးချုပ်အဖြစ် တာဝန်ယူထားသည့် မိုဒီနှင့် ၎င်း၏မဟာမိတ်များကတစ်ဖက်၊ ပါတီနှစ်ဒါဇင်ပူးပေါင်းထားသည့် အတိုက်အခံအုပ်စုကတစ်ဖက် ယှဉ်ပြိုင်သွားမည်ဖြစ်ကာ မိုဒီ၏ဘာရာတီယာဂျာနာတာ(BJP)ပါတီက အလွယ်တကူအနိုင်ရဖွယ်ရှိသည်ဟု လူထုသဘောထားစစ်တမ်းများတွင်ခန့်မှန်းထားသည်။ မတ်လ ၃၁ ရက်က ပြုလုပ်သည့် လူထုစုဝေးပွဲတွင် အတိုက်အခံခေါင်းဆောင်များက အလံများဝှေ့ယမ်းနေသည့် လူအုပ်ကြီးကိုမိန့်ခွန်းပြောကြားခဲ့ပြီး ၎င်းတို့၏ လုပ်ဖော်ကိုင်ဖက်အများအပြားအား မိုဒီ၏အစိုးရက ဖမ်း ဆီးထားသည့်အပေါ်ဝေဖန်ခဲ့ပြီး ယင်းသို့ဖမ်းဆီးခြင်းသည် ဒီမိုကရေစီနှင့် ကိုက်ညီမှုမရှိဟုဆိုသည်။ ထို့ပြင် မိုဒီ၏ BJP ပါတီသည်…

အမေရိကန်သမ္မတစီးနင်းသည့် Air Force One လေယာဉ်ပေါ်တွင် လိုက်ပါသတင်းယူကြသော သတင်းထောက်များနှင့် အခြားသူများက ယင်းလေယာဉ်ပေါ်ရှိ အသုံးအဆောင်ပစ္စည်းများကို ခိုးယူကြသည့်ကိစ္စအား စုံစမ်းစစ်ဆေးနေသည်ဟူသော သတင်းသည် မတ် ၃၀ ရက်တွင် ၀ါရှင်တန်မှ ထွက် ပေါ်လာခဲ့သည်ဟု Politico သတင်းဌာနက ဖော်ပြခဲ့သည်။ “သတင်းထောက်တွေ၊ အခြားသူတွေဟာ စာထွင်းထားတဲ့ ဝီစကီဖန်ခွက်တွေကနေ ၀ိုင်ဖန်ခွက်တွေအထိ Air Force One တံဆိပ်ပါတဲ့ဟာတွေကို လေယာဉ်ပေါ်ကမဆင်းမီ ယူချသွားကြတာဖြစ်ပါတယ်”ဟု Politico က ဖော်ပြခဲ့သည်။ သတင်းထောက်များလိုက်ပါသတင်းရယူသည့် Air Force One ပေါ်ရှိ သတင်းထောက်များ အခန်းမှပစ္စည်းများ ပျောက်ဆုံးနေခြင်းကို သိရှိသည်ဟူသော ပြင်းထန်သည့်သတိပေးချက်ကို လွန်ခဲ့သောလတွင် အိမ်ဖြူတော် သတင်းထောက်များအစည်းအရုံးက ၎င်း၏အဖွဲ့ဝင်များထံ အီးမေးလ်ပို့ခဲ့သည်။ သတင်းထောက်များသည ်အဆိုပါပစ္စည်းများကို အမှတ်တရအဖြစ် သိမ်းဆည်းကြခြင်းဖြစ်သည်ဟု ဆိုသည်။ အမေရိကန်သမ္မတတစ်ဦးခရီးသွားသည့်အခါ ၎င်းစီးနင်းသော Air Force One လေယာဉ်ပေါ်တွင် သတင်းထောက် ၁၃ ဦး လိုက်ပါသည်ဟု သိရသည်။ သတင်းဌာနများသည် Air Force One ပေါ်တွင် သတင်းလိုက်ယူသော ၎င်းတို့၏သတင်းထောက်များအတွက် လေယာဉ်စီးနင်းခကို ကျခံပေးသည်ဟု ဆိုသည်။ ယင်းခရီးစဉ်အတွင်း စားသောက်စရိတ်များကိုပါ မိခင်သတင်းဌာနများက ပေးသည်ဟု သိရသည်။ Air Force One လေယာဉ်အမှုထမ်းများက အမှတ်တရလက်ဆောင်ပစ္စည်းများအဖြစ် သမ္မတတံဆိပ်နှင့် သမ္မတလက်မှတ်ပါသော M&M ချော့ကလက်ထုပ်လေးများကို ပေးသည်။ မျက်မှန်များနှင့်အခြား Air Force One တံဆိပ်ပါသော ပစ္စည်းများကို အွန်လိုင်းမှ ဝယ်ယူနိုင်သည်ဟု…

ကမ္ဘာတစ်ဝန်းတွင် အလွန်အမင်းဆိုးရွားပြင်းထန်သည့် အပူချိန်များ၊ အပူလှိုင်းများ ကျရောက်မှုသည် ရာသီဥတုဖောက်ပြန်ပြောင်းလဲမှုကြောင့် ဖြစ်ပွားလာခဲ့သည့် လူသားများ၏ အသက်အန္တရာယ်ကို ခြိမ်း ခြောက်မှုအရှိဆုံး ပြဿနာများထဲတွင် တစ်ခုအပါအဝင်ဖြစ်သည်။ သို့သော် လူသားများသည် ဆိုးရွားပြင်းထန်သည့် အပူချိန်များနှင့် ပတ်သက်ပြီး ဟာရီကိန်းမုန်တိုင်းများနှင့် ရေလွှမ်းမိုးမှုများကဲ့သို့ သဘာဝဘေးအန္တရာယ်များလောက် အာရုံစိုက်မှုနည်းပါးနေသည်ဟု လူသား ချင်းစာနာထောက်ထားမှုဆိုင်ရာ အကူအညီပေးရေးအဖွဲ့များက သတိပေးခဲ့သည်။ ၂၀၂၃ ခုနှစ်သည် ကမ္ဘာပေါ်တွင် အပူပြင်းဆုံးနှစ်အဖြစ် စံချိန်တင်ခဲ့ပြီး ခံနိုင်ရည်အားနည်းသူများ အထူးသဖြင့် သက်ကြီးရွယ်အိုများ၊ အမိုးအကာများ၏ အပြင်ဘက်တွင် အလုပ်လုပ်ကိုင်နေရသူများ၊ လေအေးပေးစက်ကဲ့သို့ အအေးခန်းစနစ်များ မသုံးစွဲနိုင်သူများအပေါ် ဆိုးဆိုး ရွားရွားထိခိုက်စေခဲ့သည်။ ကမ္ဘာ့ကြက်ခြေနီအဖွဲ့နှင့် အမေရိကန်၏ နိုင်ငံတကာ ဖွံ့ဖြိုးတိုးတက်ရေးအေဂျင်စီ (USAID) တို့ကမူ အလွန်အမင်း ဆိုးရွားပြင်းထန်သည့် အပူချိန်များကို “အသံတိတ် လူသတ်သမား”ဟု အွန်လိုင်းမှပြုလုပ်သည့် အစည်းအဝေးတစ်ခုတွင် သုံးနှုန်းဖော်ပြခဲ့သည်။ “ကမ္ဘာတစ်ဝန်းမှာ အလွန်အမင်းဆိုးရွားပြင်းထန်တဲ့ အပူချိန်တွေနဲ့ပတ်သက်ပြီး နိုင်ငံတွေနဲ့ လူ့အဖွဲ့ အစည်းတွေကို ကြိုတင်ပြင်ဆင်မှုတွေရှိစေဖို့အတွက် ခိုင်မာတဲ့ အစီအစဉ်တွေ လုပ်ဆောင်ပေးကြဖို့ အ စိုးရတွေ၊ လူမှုအဖွဲ့အစည်းတွေ၊ လူငယ်တွေနဲ့ စီးပွားရေးအဖွဲ့အစည်းတွေ အားလုံးကို ကျွန်တော်တို့ တိုက် တွန်းပါတယ်”ဟု နိုင်ငံတကာ ကြက်ခြေနီနှင့် လခြမ်းနီ အဖွဲ့ချုပ်၏ အတွင်းရေးမှူးချုပ် ဂျာဂန်ချာပါဂါအင် က ပြောကြားခဲ့သည်။ USAID အကြီးအကဲ ဆမန်သာ ပါ၀ါကလည်း အပူချိန်ကြောင့် လူသေဆုံးမှုအရေအတွက်သည် ဟာရီကိန်းမုန်တိုင်းများ၊ ရေလွှမ်းမိုးမှုများနှင့် လေဆင်နှာမောင်းတိုက်ခတ်မှုများကြောင့် သေဆုံးသူစုစုပေါင်း၏ အရေအတွက်ထက် ပိုမိုများပြားကြောင်း သတိပေးခဲ့သည်။ “ဖွံ့ဖြိုးတိုးတက်ရေးအေဂျင်စီတွေ၊ ပရဟိတအသင်းအဖွဲ့တွေနဲ့ အခြားအလှူရှင်တွေအနေနဲ့ အပူ…

မွန်ပြည်နယ် ပေါင်မြို့နယ်အတွင်းရှိ ဒေသအချို့တွင် သောက်သုံးရေ အခက်အခဲများ ဖြစ်ပေါ်နေကြောင်း ဒေသခံများ၏ ပြောကြားချက်များအရ သိရသည်။ ပူပြင်းသည့် ရာသီဥတုကြောင့် ပေါင်မြို့နယ်အတွင်းရှိ အလှပ်၊ ဝဲပတန်၊ ကော့ထော်၊ သပြေကုန်း၊ တပ်မှူးချောင်အစရှိသော ကျေးရွာ ၁၄ ရွာခန့်တွင် သောက်သုံးရေများ အခက်အခဲဖြစ်နေကြောင်း ဒေသခံတစ်ဦးက ပြောကြားသည်။ ၎င်းက ဆက်လက်ပြီး “ရာသီဥတုက အရမ်းပူတော့ ရေတွင်းရေကန်တွေက မတ်လတတိယပတ်ထဲကစပြီး ရေတွေခန်းကုန်တယ်။ ဒါကလည်း နှစ်စဉ်ဖြစ်နေကျဆိုပေမဲ့ ရေတွင်းရေကန်တွေခန်းတာ တစ်နှစ်ထက်တစ်နှစ်က ပိုပိုဆိုးလာတယ်” ဟုပြောကြားသည်။ မိုးကျစောပါက ရေတွင်းရေကန်များမှ သောက်သုံးရေများ ပြန်လည်ရရှိနိုင်၍ အဆင်ပြေနိုင်သော်လည်း မိုးနောက်ကျပါက သောက်သုံးရေအခက်အခဲ ပိုမိုကြုံတွေ့ရနိုင်ကြောင်းလည်း အဆိုပါဒေသခံက ပြောကြားသည်။ ထို့အတွက်ကြောင့် ပေါင်မြို့နယ် မီးသတ်ဦးစီးဌာနက သောက်သုံးရေအခက်အခဲဖြစ်နေသည့်ကျေးရွာများသို့ သောက်သုံးရေများ သွားရောက်လှူဒါန်းပေးနေကြောင်း သိရသည်။ လက်ရှိနွေရာသီကာလအတွင်း ပေါင်မြို့နယ်အပြင် ကျန်မွန်ပြည်နယ်အတွင်းရှိ မြို့နယ်တချို့တွင်လည်း သောက်သုံးရေရှားပါးသည့်အခက်အခဲများနှင့် ရင်ဆိုင်နေရကြောင်းနှင့် မြန်မာနိုင်ငံမီးသတ်ဦးစီးဌာနနှင့် ပရဟိတအရေးပေါ်လူမှုကူညီကယ်ဆယ်ရေးအသင်းအဖွဲ့များက သောက်သုံးရေ လိုအပ်ချက်ရှိသည့်နေရာများသို့ ရေများ ဖြန့်ဝေလှူဒါန်း ပေးနေကြောင်း သိရသည်။

မိုင်းဖုန်းဆရာတော် ဘဒ္ဒန္တဉာဏသံဝရအား ထိုင်းဘုရင် မဟာဝဇီယာလောင်ကွန်းနှင့် မိဖုရားတို့ မတ် ၃၀ ရက်တွင် လာရောက်ဖူးမျှော်ကန်တော့ခဲ့ကြောင်း ထိုင်းနိုင်ငံချင်းရိုင်ခရိုင် ပြည်သူ့ဆက်ဆံရေးရုံးက ထုတ်ပြန်သည်။ မိုင်းဖုန်းဆရာတော်မှာ လက်ရှိတွင် ထိုင်းနိုင်ငံချင်းရိုင်ခရိုင်တွင် သီတင်းသုံးနေခြင်းဖြစ်သည်။ လာရောက်ဖူး‌မြော်ခဲ့သည့် ထိုင်းဘုရင်နှင့် မိဖုရားတို့အား ဆရာတော်က ဗုဒ္ဓဆင်းတုတော်များ ချီးမြှင့်ပေးခဲ့သည်ဟု သိရသည်။ မိုင်းဖုန်းဆရာတော်အား မြန်မာနိုင်ငံဘက်မှသာမက ထိုင်းနိုင်ငံဘက် ကြည်ညိုသူများလည်းရှိပြီး လက်ရှိတွင် ထိုင်းဘုရင်နှင့် မိဖုရားက လာရောက်ဖူး‌မြော်ခဲ့ခြင်းဖြစ်သည်။ ပြီးခဲ့သည့်နှစ်က ဆရာတော်မှာ ထိုင်းနိုင်ငံတွင် ကျန်းမာရေးစောင့် ရှောက်မှုခံယူခဲ့ရဖူးသည်။ ၂၀၁၈ ခုနှစ်တွင် ချင်းရိုင်ခရိုင်ရှိ ဂူအတွင်း ပိတ်မိနေသည့် တောဝက်ဘောလုံးအသင်းမှ ကလေးငယ်များပိတ်မိသည့် ဖြစ်စဉ်တွင် ကလေးငယ်များကို အသက်ရှင်လျက် တွေ့ရှိရမည်ဟု ဆရာတော်က မိန့်ကြားခဲ့ဖူးသည်။

မန်စီးတီးအသင်းနည်းပြ ဂွါဒီယိုလာက အာဆင်နယ်အသင်းနှင့် သရေကျပြီးနောက် ဇယားထိပ်ဆုံးအသင်းသာ ရေပန်းအစားဆုံးဖြစ်ပြီး မိမိတို့လက်ထဲတွင်မရှိတော့ကြောင်း ဝန်ခံပြောကြားခဲ့သည်။ မတ် ၃၁ ရက်က ယှဉ်ပြိုင်ကစားသည့် ပရီးမီးယားလိဂ်ပွဲစဉ်တွင် မန်စီးတီးအသင်းအနေဖြင့် အာဆင်နယ်အသင်းအား ဘောလုံးပိုင်ဆိုင်မှု ၇၃ ရာခိုင်နှုန်းအထိ အသာစီးရယူ၍ ဖိအားပေးနိုင်ခဲ့သော်လည်း ဂိုးပေါက်တည့်သည့်ခြိမ်းခြောက်မှု တစ်ကြိမ်သာရှိခဲ့သလို ၂၀၂၁ ခုနှစ် အောက်တိုဘာနောက်ပိုင်း အီတီဟတ်ကွင်း၌ကစားသည့် အမှတ်ပေးပွဲများတွင် ဂိုးမသွင်းနိုင်သည့် ပထမဆုံးပွဲအဖြစ် မှတ်တမ်းဝင်ခဲ့သည်။ ယင်းပွဲရလဒ်ကြောင့် ၂၉ ပွဲစီကစားအပြီးတွင် လီဗာပူးလ်အသင်းက ၆၇ မှတ်ဖြင့် ဇယားထိပ်ဆုံးသို့ရောက်ရှိသွားပြီး အာဆင်နယ်အသင်းက ၆၅ မှတ်၊ မန်စီးတီးအသင်းက ၆၄ မှတ်ဖြင့် ရပ်တည်လျက်ရှိသည်။ သို့ဖြစ်ရာ ချန်ပီယံဆုအတွက် ရေပန်းစားမှုနှင့်ပတ်သက်၍ မေးမြန်းမှုအပေါ် ဂွါဒီယိုလာက ”ဟုတ်ပါတယ်။ ပထမနေရာက အသင်းကသာ ရေပန်းအစားဆုံးပါ။ အာဆင်နယ်က ဒုတိယနဲ့ ကျွန်တော်တို့က တတိယပေါ့။ အဲဒါက ကျွန်တော်တို့လက်ထဲမှာမရှိတော့ပါဘူး။ ကျွန်တော်တို့လုပ်နိုင်တာက အက်စတွန်ဗီလာနဲ့ကစားရမယ့် ပွဲအကြောင်း စဉ်းစားဖို့ပါပဲ။ ကျွန်တော်တို့ အရင်ကဖြစ်ခဲ့သလိုပဲ ခင်ဗျားက အမှတ်ပေးဇယားထိပ်ဆုံး ရောက်နေတဲ့အခါ ခင်ဗျားက ရေပန်းစားမှာ ပါ” ဟု ဖြေကြားခဲ့သည်။

PSG အသင်းနည်းပြ အန်နရီကေးက ပြင်သစ်တိုက်စစ်မှူး ဘာပေအနေဖြင့် လာမည့်နွေရာသီတွင် အသင်းမှ ထွက်ခွာမည်ဟု သတင်းထွက်နေသော်လည်း စိတ်ပြောင်းနိုင်သေးသည်ဟု ဆိုခဲ့သည်။ အန်နရီကေးက ”ဘာပေ စိတ်ပြောင်းနိုင်တယ်လို့ ကျွန်တော် အမြဲတမ်းမျှော်လင့်ထားပါတယ်။ လက်ရှိအချိန်အထိ သူ ဘာမှ မပြောသေးပါဘူး။ သူ စိတ်ပြောင်းနိုင်ပါတယ်။ ကျွန်တော်တို့ ဒီရာသီမှာ ဖလား(၄)လုံးရခဲ့ရင် ပါရီမှာ ဆက်နေဖို့ သူ ဆုံးဖြတ်နိုင်ပါတယ်။ ဘာကြောင့် မဖြစ်နိုင်ရမှာလဲ။ ကျွန်တော်တို့ စောင့်ကြည့်ရမှာပါ”ဟု ပြောကြားခဲ့သည်။ ဘာပေသည် အနာဂတ်အတွက် ယူရို-၂၀၂၄ ပြိုင်ပွဲမတိုင်မီ ဆုံးဖြတ်သွားမည်ဟု ပြောကြားထားသည်။

အီဂျစ်ဘောလုံးအဖွဲ့ချုပ်ဥက္ကဋ္ဌ ဖြစ်သူ ဂါမယ်လ်အယ်လမ်က လက်ရွေးစင်အသင်းခေါင်းဆောင် ဆာလာသည် ၂၀၂၄ ပါရီအိုလံပစ်ပြိုင်ပွဲ၌ အီဂျစ်အိုလံပစ်အသင်းကို ဦးဆောင်ရန် ဆန္ဒရှိနေကြောင်း ပြောကြားခဲ့သည်။ အီဂျစ်အသင်းသည် ပါရီအိုလံပစ်ပြိုင်ပွဲတွင် စပိန်၊ ဒိုမီနီကန်၊ အာရှမှ အသင်းတစ်သင်းနှင့်အတူ အုပ်စု(C) တွင် ကျရောက်နေသည်။ အီဂျစ်အသင်းသည် အိုလံပစ်ပြိုင်ပွဲကို (၁၃) ကြိမ်မြောက်အဖြစ် ယှဉ်ပြိုင်ခွင့်ရရှိ ခြင်းဖြစ်ပြီး ဆာလာသည် ၂၀၁၂ လန် ဒန်အိုလံပစ်ပြိုင်ပွဲတစ်ကြိမ်သာ အီဂျစ်အသင်းအတွက် ကစားပေးခဲ့ဖူး ကြောင်း သိရသည်။ ဆာလာသည် လန်ဒန်အိုလံပစ်ပြိုင်ပွဲ၌ အသက်မီသည့်ကစားသမားအဖြစ် ပါဝင်ကစားခဲ့ခြင်းဖြစ်ပြီး ကွာတားဖိုင်နယ်အဆင့် သို့ ရောက်ရှိခဲ့သည်။ ဆာလာသည် လာမည့် ပါရီအိုလံပစ်ပြိုင်ပွဲတွင် အသက်ကျော်ကစားသမားအဖြစ် အီဂျစ်အသင်းကို ဦးဆောင်ရန် ဆန္ဒရှိနေခြင်းဖြစ်ကြောင်း ဂါမယ်လ်အယ်လမ်က ပြောကြားခဲ့ခြင်းဖြစ်သည်။ “မိုဟာမက်ဆာလာဟာ ၂၀၂၄ ပါရီအိုလံပစ်ပြိုင်ပွဲမှာ အိုလံပစ်အသင်းနဲ့ ယှဉ်ပြိုင်ကစားဖို့ ဆန္ဒရှိနေပါတယ်။ သူ အဲဒီမှာ ရှိပါလိမ့်မယ်”ဟု ဂါမယ်လ်အယ်လမ်က ပြောကြားခဲ့သည်။ သို့သော် ပါရီအိုလံပစ်ပြိုင်ပွဲကို ဇူလိုင်(၂၄)မှ သြဂုတ်(၉)အထိ ကျင်းပမည်ဖြစ်သောကြောင့် ဥရောပကလပ်အသင်းများ၏ ရာသီကြိုပြင်ဆင်မှုကို ထိခိုက်မည်ဖြစ်သည့်အတွက် လီဗာပူးလ်အသင်းက ဆာလာကို စေလွှတ်ဖွယ်မရှိကြောင်း သိရသည်။ လီဗာပူးလ်အသင်းသည် ပြီးခဲ့သည့် ၂၀၂၀ တိုကျိုအိုလံပစ်ပြိုင်ပွဲတွင်လည်း ဆာလာကို စေလွှတ်ပေးရန် ငြင်းဆန်ခဲ့ဖူးကြောင်း သိရသည်။ အိုလံပစ်ပြိုင်ပွဲမှာ ကမ္ဘာ့ဘောလုံးအဖွဲ့ ချုပ် (FIFA)၏ ဘောလုံးပြက္ခဒိန်တွင် ပါဝင်ခြင်းမရှိသဖြင့် ကလပ်အသင်းများအနေဖြင့် ကစားသမားစေလွှတ်ရန် ငြင်းဆန်ခွင့်ရှိကြောင်း သိရသည်။ အီဂျစ်အသင်းသည် အမြင့်ဆုံးအဖြစ် ဆီမီးဖိုင်နယ်အဆင့်သာ ရောက်ရှိဖူးကြောင်း သိရသည်။

မုဒိမ်းမှုကြောင့် ထောင်ဒဏ်(၄)နှစ်ခွဲ ချမှတ်ခံထားရရာမှ အာမခံဖြင့် ပြန်လည်လွတ်မြောက်လာခဲ့သည့် ဘရာဇီးလ်နောက်ခံလူဟောင်း အဲလ်ဗတ်စ်အတွက် အာမခံငွေကို ဘရာဇီးလ်မဂ္ဂဇင်းတစ်စောင်က ပေးအပ်ခဲ့ကြောင်း Mundo Deportivo သတင်းစာက ဖော်ပြခဲ့သည်။ အဲလ်ဗတ်စ်သည် ၂၀၂၃ ခုနှစ် ဇန်နဝါရီလကတည်းက ဘာစီလိုနာမြို့မှ အကျဉ်းထောင်တွင် ထိန်းသိမ်းခံထားရခြင်းဖြစ်ပြီး ပြီးခဲ့သည့်တစ်ပတ် တနင်္လာနေ့တွင် အာမခံငွေ ယူရို(၁)သန်းပေးဆောင်ကာ ပြန်လည်လွတ်မြောက်လာခဲ့ခြင်းဖြစ်သည်။ အဆိုပါအာမခံငွေကြေးက အစောပိုင်းတွင် အသင်းဖော်ဟောင်း နေမာ စိုက်ထုတ်ပေးမည်ဟု သတင်းထွက်ခဲ့သလို၊ နောက်ပိုင်း၌ ဘာစီလိုနာအသင်းဖော်တစ်ဦးပင်ဖြစ်သည့် ဒီပိုင်းက ပေးအပ်ခဲ့ကြောင်းလည်း သတင်းထွက်ခဲ့သည်။ ယခုအခါ စပိန်ဂျာနယ်လစ်တစ်ဦးက အဲလ်ဗတ်စ်အတွက် အာမခံငွေကို ဘရာဇီးလ်မဂ္ဂဇင်းတစ်စောင်က စိုက်ထုတ်ပေးခဲ့ခြင်းဖြစ်ပြီး အဆိုပါမဂ္ဂဇင်းသည် ဘရာဇီးလ်နှင့် နိုင်ငံတကာမှ အရေးကြီးလူပုဂ္ဂိုလ်များအကြောင်း ရေးသားဖော်ပြခြင်းဖြင့် လူသိများသည့် မဂ္ဂဇင်းတစ်စောင်ဖြစ်ကြောင်း၊ အာမခံငွေ စိုက်ထုတ်ပေးခြင်းဖြင့် အဲလ်ဗတ်စ်၏ အင်တာဗျူးများ၊ ဘဝအကြောင်းများကို အထူးသီးသန့်အဖြစ် ဖော်ပြခွင့်ရမည်ဟု သိရသည်။