လိဂ်ဖလားပြိုင်ပွဲ ဗိုလ်လုပွဲအချိန်ပိုတွင် ကလေးအသင်းနှင့် ပေါင်ဘီလျံချီသည့်အသင်း ယှဉ်ပြိုင်ခဲ့ရသည်ဟု နာမည်ကြီးဘောလုံးဝေဖန်သူ ဂယ်ရီနဗီးလ်၏ ဝေဖန်ပြောဆိုမှုကို ချယ်လ်ဆီးအသင်းနည်းပြ ပိုချက်တီနိုက ပြန်လည်တုံ့ပြန်ခဲ့ကြောင်း သိရသည်။
လိဂ်ဖလားဗိုလ်လုပွဲတွင် လီဗာပူးလ်အသင်းအနေဖြင့် အဓိက ကစားသမားများ ဒဏ်ရာကြောင့် မပါဝင်နိုင်ဘဲ ကော်နာဘရက်ဒလေ (၂၀ နှစ်)၊ အဲလိယက် (၂၀ နှစ်)၊ ဂရာဗန်ဘက်ချ် (၂၁ နှစ်) တို့ကို ပွဲထွက်ကစားသမားအဖြစ် အသုံးပြုခဲ့သလို ဒုတိယပိုင်းနှင့် အချိန်ပိုတွင် ဘော်ဘီကလက်ခ် (၁၉ နှစ်)၊ ဂျေဒန်ဒန်းစ် (၁၈ နှစ်)၊ ဂျိမ်းစ်မက်ကွန်နယ်လ် (၁၉ နှစ်)၊ ဂျာရဲလ်ကွမ်ဆာ (၂၁ နှစ်) တို့ကို ထပ်မံထည့်သွင်းကစားစေခဲ့သည်။
သို့ဖြစ်ရာ Sky Sports ရုပ်သံ၏ ဘောလုံးဝေဖန်သူ ဂယ်ရီနဗီးလ်က အချိန်ပိုတွင် ယာဂန်ကလော့ပ်၏ ကလေးအသင်းနှင့် ပေါင်ဘီလျံတန်ဖိုးရှိသော်လည်း ဖိအားများအောက် အမြဲတစေလဲပြိုနေသည့်အသင်းတို့ ယှဉ်ပြိုင်ခဲ့ရကြောင်း သုံးသပ်ပြောကြားခဲ့သည်။
သို့ဖြစ်ရာ ပိုချက်တီနိုက ”သူပြောတာကို ကျွန်တော်မကြားလိုက်ပါဘူး။ ဒါပေမဲ့ ဒီနှစ်သင်းရဲ့အသက်ကို နှိုင်းယှဉ်တာဆိုရင် အတူတူပဲလို့ ကျွန်တော်ထင်တယ်။ ဂယ်ရီနဲ့ ကျွန်တော်က ကောင်းမွန်တဲ့ဆက်ဆံရေးရှိပြီး ဒီလို ပြောတာကို ဘယ်လိုလက်ခံရမလဲဆိုတာ ကျွန်တော်မသိပါဘူး။ ဒါပေမဲ့ သူ့ရဲ့အမြင်ကို ကျွန်တော်လေးစားမှုရှိပါတယ်။ အချိန်ပိုမှာ ဂယ်လာဂါနဲ့ ချီဝဲလ်တို့လို ပြောင်းလဲမှုအနည်းငယ်ကို ကျွန်တော်တို့လုပ်ခဲ့ပါတယ်။ ဒါပေမဲ့ ဒုတိယပိုင်းပြီးဆုံးချိန်အထိ အဲဒီစွမ်းအင်ကို ကျွန်တော်တို့မထိန်းထားနိုင်ခဲ့တာ အမှန်ပါပဲ။ ဒီအခြေအနေကို ဘယ်လိုဖော်ပြရမလဲဆိုတာ ကျွန်တော်မသိပါဘူး။ ဒါပေမဲ့ ကစားသမားတွေအတွက် ဂုဏ်ယူတယ်လို့ ခံစားမိတာ သေချာပါတယ်။ သူတို့က ကြီးကြီးမားမားအားထုတ်ခဲ့ကြတယ်လို့ ကျွန်တော်ထင်တယ်။ ကျွန်တော်တို့က ငယ်ရွယ်တဲ့အသင်းဖြစ်ပြီး လီဗာပူးလ်နဲ့ နှိုင်းယှဉ်လို့မရပါဘူး။ ဘာဖြစ်လို့လဲဆိုတော့ လီဗာပူးလ်ကလည်း ငယ်ရွယ်တဲ့ကစားသမားတချို့ကို ပွဲပြီးချိန်အထိအသုံးပြုခဲ့လို့ပါ။ အဲဒါကို နှိုင်းယှဉ်လို့မရဘူးဆိုတာ သူသိပါတယ်။ အရာရာကွဲပြားခြားနားတယ်ဆိုတာကို သူသိပါတယ်။ သူအဲဒီလိုပြောတယ်ဆိုရင် မျှတမှုမရှိဘူးလို့ ကျွန်တော်ထင်တယ်။ ဒါပေမဲ့ ကျွန်တော်တို့အနေနဲ့ ခိုင်ခိုင်မာမာ ရှေ့ဆက်သွားမှာဖြစ်ပြီး ဒီစီမံကိန်းကိုယုံကြည်မှုရှိပါတယ်။ ပြီးတော့ အနာဂတ်မှာ ကျွန်တော်တို့ ဘာလုပ်နိုင်မလဲဆိုတာ ကြည့်ကြတာပေါ့” ဟု တုံ့ပြန်ပြောကြားသည်။
ချယ်လ်ဆီးအသင်းအနေဖြင့် ဝင်ဘလေကွင်း၌ကစားရသည့် ပြည်တွင်းဖလားဗိုလ်လုပွဲ ခြောက်ပွဲဆက်တိုက် ရှုံးပွဲကြုံတွေ့ခြင်းဖြစ်ပြီး ၂၀၂၀၊ ၂၀၂၁၊ ၂၀၂၂ FA ဖလားနှင့် ၂၀၁၉၊ ၂၀၂၂၊ ၂၀၂၄ လိဂ်ဖလားပြိုင်ပွဲတွင် ရှုံးနိမ့်ထားသလို ပိုချက်တီနိုမှာလည်း အင်္ဂလန်၌ ဆုဖလားရယူခွင့် ထပ်မံလွဲချော်ခဲ့ရသည်။
