ကချင်တိုင်းရင်းသား မြန်မာ MMA ဖိုက်တာ အောင်လအန်ဆန်နှင့် ONE Championship တို့ ချုပ်ဆိုထားသည့် စာချုပ်သစ်မှာ ၆ ပွဲဖြစ်ပြီး ၁၂ လအတွင်း ၃ ပွဲထိုးသတ်ခွင့်ပေးရမည့်အချက်ပါဝင်ကြောင်း သိရသည်။
အောင်လအန်ဆန်နှင့် ONE Championship တို့ အကြား စာချုပ်သက်တမ်းတိုးရေးကိစ္စရပ်မှာ ပြီးခဲ့သည့် ဇန်နဝါရီ ၂၈ ရက်က ဂျပန်နိုင်ငံ၊ တိုကျိုမြို့တွင် ကျင်းပပြုလုပ်သည့် ONE 165 ပြိုင်ပွဲအပြီးတွင် နှစ်ဖက်သဘောတူညီမှုရရှိခဲ့ခြင်းဖြစ်သည်။
အောင်လအန်ဆန်သည် ယင်းပြိုင်ပွဲတွင် Sportskeeda MMA Originals မီဒီယာမှ ဂျာနယ်လစ်ဖြစ်သူ Nick Atkin နှင့် ပြုလုပ်ခဲ့သည့် အင်တာဗျူးတွင် စာချုပ်ကိစ္စရပ်များကို ပြောကြားခဲ့ခြင်းဖြစ်သည်။
အောင်လအန်ဆန်က ”စာချုပ်ကိစ္စရပ်က ကြန့်ကြာမှုတွေဖြစ်ခဲ့တာ မှန်ပါတယ်။ ဒါပေမဲ့ အခူကတော့ သတင်းကောင်းပါ။ ကျွန်တော်က ဒီမှာ(ONE Championship) ကာလအကြာကြီး ကစားခဲ့တဲ့သူဆိုတော့ အခုလို ပြန်လက်တွဲခွင့်ရတဲ့အ ပေါ် ဝမ်းသာရပါတယ်။ ကျွန်တော် ခင်ဗျားကို ကတိပေးနိုင်တာက ကျွန်တော့်ရဲ့ ချန်ပီယံခါးပတ်ကို ပြန်ရယူဖို့ ဘယ်ဖိုက်တာနဲ့မဆို ရင်ဆိုင်ဖို့အသင့်ပါပဲ။ စာချုပ်ထဲမှာ သဘောတူညီမှုနဲ့ ထည့်သွင်းထားတဲ့အချက်တွေက လာမယ့်လအနည်းငယ်အတွင်းမှာ ကျွန်တော့်ကို ပွဲပေးရမယ်။ ၁၂ လအတွင်း ၃ ပွဲထိုးသတ်ခွင့် ပေးရမယ်။ စာချုပ်က ၆ ပွဲပါ” ဟု ပြောကြားခဲ့ခြင်းဖြစ်သည်။
အောင်လအန်ဆန်သည် သူ၏ အနီးစပ်ဆုံးပွဲနှင့် ပတ်သက်၍ အသေးစိတ်ထုတ်ဖော်ပြောဆိုသွားခြင်းမရှိသော်လည်း လာမည့်လအနည်းငယ်အတွင်း သူ၏ပွဲကို မြင်တွေ့ရလိမ့်မည်ဟု ထုတ်ဖော်ပြောကြားခဲ့သည်။
ONE မစ်ဒယ်ဝိတ်တန်းချန်ပီယံခါးပတ်လုပွဲအဖြစ် လာမည့်မတ် ၁ ရက်တွင် လက်ရှိချန်ပီယံ ဒီရစ်ဒါနှင့် စိန်ခေါ်သူ မာလီခင်တို့၏ပွဲကို ကာတာနိုင်ငံတွင်ကျင်းပပြုလုပ်မည်ဖြစ်သည်။
အောင်လအန်ဆန်သည် ONE Championship နှင့် စာချုပ်ကိစ္စရပ်အတွက် သဘောတူညီမှုမရမီက လာမည့် ဧပြီတွင် ၎င်း၏ပွဲကိုမြင်တွေ့ရမည်ဟု ပြောကြားထားသည်။
ထို့ကြောင့် အောင်လအန်ဆန်သည် ဒီရစ်ဒါနှင့် မာလီခင်တို့၏ ONE မစ်ဒယ်ဝိတ်တန်းချန်ပီယံခါးပတ်လုပွဲမှ အနိုင်ရရှိသူကို စိန်ခေါ်ခွင့်ရရန် မျှော်လင့်ဖွယ်ရှိနေသည်။
အောင်လအန်ဆန်နှင့် ONE Championship တို့၏ စာချုပ်သက်တမ်းမှာ ပြီးခဲ့သည့် ၂၀၂၃ ခုနှစ် ဧပြီကတည်းက ကုန်ဆုံးခဲ့ခြင်းဖြစ်သည်။
အောင်လအန်ဆန်သည် ONE Championship နှင့် လက်တွဲခဲ့စဉ်အတွင်း MMA ပွဲပေါင်း (၁၉) ပွဲ ထိုးသတ်ခဲ့ရာ (၁၅) ပွဲနိုင်၊ (၄) ပွဲရှုံးနိမ့်ခဲ့ပြီး လိုက်ဟဲဗီးဝိတ်တန်းနှင့် မစ်ဒယ်ဝိတ်တန်းတို့၏ ကမ္ဘာ့ချန်ပီယံအဖြစ် ရပ်တည်နိုင်ခဲ့သည်။
အောင်လအန်ဆန်သည် နောက်ဆုံးပွဲအဖြစ် ပြီးခဲ့သည့် ၂၀၂၃ ခုနှစ် မေလအတွင်းက အမေရိကန်နိုင်ငံတွင် တရုတ်ဖိုက်တာ ဖန်ယုံနှင့် ထိုးသတ်ခဲ့ပြီး ဒုတိယအချီတွင် ချုပ်ကွက်ဖြင့် အနိုင်ရထားသည်။
