လီဗာပူးလ်အသင်းမှ အီဂျစ်တိုက်စစ်ကစားသမား ဆာလာ၏ ဒဏ်ရာသည့် မူလမျှော်မှန်းထားသည့်အခြေအနေထက် ပိုမိုဆိုးရွားနေကြောင်း အသင်းက သတင်းထုတ်ပြန်ခဲ့သည်။ ဆာလာ၏အေးဂျင့်ဖြစ်သူကလည်း ရာမီအဘားစ်ကလည်း လူမှုကွန်ရက် X တွင် မိုဟာမက်၏ ဒဏ်ရာသည် ပထမဆုံးယူဆထားသည်ထက် ပိုမိုပြင်းထန်နေကြောင်းနှင့် ရက်ပေါင်း ၂၁ ရက်မှ ၂၈ ရက်အကြား အနားယူရနိုင်ကြောင်း ရေးသားခဲ့သည်။
အစောပိုင်းသတင်းများတွင် ဆာလာ၏ဒဏ်ရာကို တံကောက်ကြောဒဏ်ရာအဖြစ်သာ ဖော်ပြခဲ့သော်လည်း လီဗာပူးလ်အသင်းက နောက်ဆုံးထုတ်ပြန်ချက်တွင် ကြွက်သားဒဏ်ရာ ရရှိခဲ့ခြင်းဖြစ်သည်ဟု ရေးသားထားခဲ့သည်။ ဆာလာသည် ဇန်နဝါရီ ၁၈ ရက်က အာဖရိကနိုင်ငံများဖလားပြိုင်ပွဲ အုပ်စုဒုတိယပွဲအဖြစ် ဂါနာအသင်းနှင့် (၂-၂) ဂိုးစီသရေကျသည့်ပွဲတွင် ဒဏ်ရာရရှိခဲ့ခြင်းဖြစ်ကာ ပထမပိုင်းမပြီးခင်မှာပင် လူစားလဲခဲ့ရပြီး ၎င်းအနေဖြင့် ဝဲဘက်ခြေထောက် တံကောက်ကြောဒဏ်ရာ ရရှိခဲ့ခြင်းဖြစ်သည်။
ဆာလာအနေဖြင့် ဇန်နဝါရီ ၂၂ ရက်က ကစားခဲ့သော ကိတ်ဗာဒီအသင်းနှင့် အုပ်စုနောက်ဆုံးပွဲစဉ်တွင် (၂-၂)ဂိုးစီ သရေကျခဲ့ပြီး အုပ်စုသုံးပွဲကစား သုံးပွဲစလုံးသရေဖြင့် အုပ်စု ဒုတိယနေရာရကာ ရှုံးထွက် ၁၆ သင်းအဆင့်သို့ တက်ရောက်ခွင့် ရရှိခဲ့သည်။ ၎င်းသည် ယင်းပွဲစဉ်ကို ကြည့်ရှုခဲ့ပြီးမှ လီဗာပူးလ်အသင်းတွင် ကုသမှုခံယူရန် ပြန်ခဲ့ခြင်းဖြစ်ပြီး ယနေ့ အသင်း၏လေ့ကျင့်ရေးစင်တာ AXA သို့ ပြန်လည်ရောက်ရှိမည်ဖြစ်သည်။
လီဗာပူးလ်အသင်းသည် ဆာလာအား မိခင်ကလပ်တွင် ဆေးကုသမှု ပြန်လည်ခံယူရန် အီဂျစ်ဘောလုံးအဖွဲ့ချုပ်နှင့် သဘောတူညီမှု ရယူခဲ့ပြီး လီဗာပူးလ်အသင်းဆေးအဖွဲ့နှင့်အတူ အရေးပေါ်ပြန်လည်ထူထောင်ရေးအစီအစဉ်ကို ချက်ချင်းလုပ်ဆောင်မည်ဖြစ်ကြောင်း သိရသည်။
လီဗာပူးလ်အသင်းဆေးအဖွဲ့သည် ဆာလာအား ကလပ်နှင့် နိုင်ငံလက်ရွေးစင်အသင်းအတွက် အမြန်ဆုံးပြန်လည်ကစားနိုင်ရန် ကြိုးပမ်းသွားမည်ဖြစ်ပြီး အထူးသဖြင့် ကျင်းပလျက်ရှိသည့် အာဖရိကနိုင်ငံများဖလားပြိုင်ပွဲဝင် အီဂျစ်အသင်းနှင့် ပြန်လည်ပူးပေါင်းနိုင်ရန် ကူညီသွားမည်ဖြစ်ကြောင်း ထုတ်ပြန်ချက်တွင် ရေးသားခဲ့သည်။
ဆာလာသည် အီဂျစ်အသင်း ဆီမီးဖိုင်နယ်တက်ရောက်ခဲ့လျှင် အသင်းနှင့် ပြန်လည်ပူးပေါင်းနိုင်ရန် မျှော်လင့်ထားကြောင်း အစောပိုင်းက သတင်းများ ထွက်ပေါ်ခဲ့သည်။ သို့သော် အေးဂျင့် အဘားစ်၏ ပြောကြားချက်အရ အနည်းဆုံး ၂၁ ရက် အနားယူရမည်ဆိုလျှင်ပင် ယင်းမှာ အာဖရိကနိုင်ငံများဖလား ဗိုလ်လုပွဲမတိုင်မီ သုံးရက်အလိုတွင် ဖြစ်သောကြောင့် ပြိုင်ပွဲတွင် ပြန်လည်ကစားခွင့်ရရန် အခွင့်အရေးနည်းနေကြောင်း သိရသည်။
