ကမ္ဘာ့မွေထိုင်းအဖွဲ့ချုပ် (WMO) သည် ပြီးခဲ့သည့်ရက်ပိုင်းက ၂၀၂၃ ခုနှစ်အတွက် ကမ္ဘာ့အကောင်းဆုံးမွေထိုင်းကစားသမားများ စာရင်းကို ထုတ်ပြန်ကြေညာခဲ့ပြီး ကယန်းတိုင်းရင်သူ မြန်မာ့ရိုးရာလက်ဝှေ့မယ် ဘရော်နီကာမှာ ၂၀၂၃ ခုနှစ် အမျိုးသမီး စူပါဘင်တန်ဝိတ်တန်း၏ အကောင်းဆုံး ကစားသမားအဖြစ် သတ်မှတ်ခံခဲ့ရကြောင်း သိရသည်။
ထို့ပြင် ဘရော်နီကာသည် WMO က ထုတ်ပြန်ခဲ့သည့် ၂၀၂၃ ခုနှစ်အတွက် ကမ္ဘာ့အကောင်းဆုံး အမျိုးသမီးမွေထိုင်းကစားသမား (၁၀)ဦး စာရင်းတွင်လည်း ပါဝင်ခဲ့သည်။ ကယန်းတိုင်ရင်းသူ ဘရော်နီကာသည် ၂၀၂၃ ခုနှစ်အတွင်း မွေထိုင်း (၇)ပွဲ ထိုးသတ်ခဲ့ရာ (၇)ပွဲစလုံးအနိုင်ရရှိခဲ့သည်။ ဘရော်နီ ကာသည် ယင်း (၇)ပွဲတွင် (၃)ပွဲကို အလဲထိုးဖြင့် အနိုင်ရခဲ့ပြီး (၄)ပွဲကိုမူ အမှတ်ဖြင့်အနိုင်ရရှိခဲ့ခြင်း ဖြစ်သည်။
ဘရော်နီကာသည် ပြီးခဲ့သည့် ဒီဇင်ဘာအတွင်းက Thai Fight Queen’s Cup ဗိုလ်လုပွဲ အဖြစ် ထိုင်းနိုင်ငံသူ မွေထိုင်းမယ် ဖာရာဆင်းဂါနှင့် ယှဉ်ပြိုင်ထိုးသတ်ခဲ့ရာ ပထမအချီမှာပင် အလဲထိုး ခဲ့ပြီး ချန်ပီယံခါးပတ် ကာကွယ်နိုင်ခဲ့သည်။ ဘရော်နီကာသည် ၂၀၂၃ ခုနှစ်၊ ဖေဖော်ဝါ ရီတွင် ဘရာဇီးလ်နိုင်ငံသူ မွေထိုင်းမယ် ယူရီအဲလ်ဗတ်ကို အမှတ်ဖြင့် အနိုင်ရရှိခဲ့သည့်ပွဲအား (၅၃) ကီလို(ဘင်တန်ဝိတ်တန်း)၊ ၂၀၂၃ ခုနှစ်၊ ဧပြီတွင် အီတလီနိုင်ငံသူ မွေထိုင်းမယ် အက်စတာဗီအိုလာကို အမှတ်ဖြင့် အနိုင်ရရှိခဲ့သည့်ပွဲအား (၅၃) ကီလို (ဘင်တန်ဝိတ် တန်း)၊ ၂၀၂၃ ခုနှစ် မေလတွင် ထိုင်းနိုင်ငံသူ မွေထိုင်းမယ် အွမ်ဆင်းဆရီထောင်ကို အလဲထိုးဖြင့် အနိုင်ရရှိခဲ့သည့်ပွဲအား (၅၃) ကီလို (ဘင်တန်ဝိတ်တန်း)၊ ၂၀၂၃ ခုနှစ်၊ ဇွန်လတွင် ဗီယက်နမ်နိုင်ငံသူ မွေထိုင်းမယ် ထရူရီသီဖောင်ကို အလဲထိုးဖြင့် အနိုင်ရရှိခဲ့သည့်ပွဲအား (၅၃) ကီလို (ဘင်တန်ဝိတ်တန်း)များ အဖြစ် (၄)ပွဲ ထိုးသတ်ခဲ့သည်။
ထို့နောက် ဘရော်နီကာသည် ၂၀၂၃ ခုနှစ် အောက်တိုဘာတွင် ထိုင်းနိုင်ငံသူ မွေထိုင်းမယ် ဖာရာဆင်းဂါကို အမှတ်ဖြင့် အနိုင်ရရှိခဲ့သည့်ပွဲအား (၅၄) ကီလို(စူပါဘင်တန် ၀ိတ်တန်း)၊ ၂၀၂၃ ခုနှစ် နိုဝင်ဘာတွင် အီရန်နိုင်ငံသူ မွေထိုင်းမယ် ဇဟာဆူခိုရီကို အမှတ်ဖြင့် အနိုင်ရရှိခဲ့သည့်ပွဲအား (၅၄) ကီလို(စူပါဘင်တန်ဝိတ်တန်း)၊ ၂၀၂၃ ခုနှစ်၊ ဒီဇင်ဘာတွင် ထိုင်းနိုင်ငံသူ မွေထိုင်းမယ် ဖာရာဆင်းဂါကို အလဲထိုးဖြင့် အနိုင်ရရှိခဲ့သည့် ပွဲအား (၅၄)ကီလို(စူပါဘင်တန်ဝိတ်တန်း)များ ဖြစ် (၃) ပွဲ ထိုးသတ်ခဲ့သည်။
ဘရော်နီကာသည် ၂၀၂၃ ခုနှစ်၊ နိုဝင်ဘာနှင့် ဒီဇင်ဘာတွင် ထိုးသတ်ခဲ့သည့် (၂) ပွဲကို Thai Fight Queen’s Cup အကြို ဗိုလ်လုပွဲနှင့် ဗိုလ်လုပွဲအဖြစ် ထိုးသတ်ခဲ့ပြီး ချန်ပီယံ ခါးပတ်ဆု ရရှိခဲ့ခြင်းဖြစ်သည်။ ဘရော်နီကာသည် ၂၀၂၃ ခုနှစ်အတွင်း ဘင်တန်ဝိတ်တန်း(၄) ပွဲ၊ စူပါ ဘင်တန်ဝိတ်တန်း (၃)ပွဲ ထိုးသတ်ခဲ့ခြင်းကြောင့် WMO အနေဖြင့် အမျိုးသမီး စူပါဘင်တန်ဝိတ်တန်း ၏ အကောင်းဆုံးကစားသမားအဖြစ် သတ်မှတ်ပေးခဲ့ဖွယ်ရှိကြောင်း သိရသည်။
ဘရော်နီကာသည် ပြီးခဲ့သည့် ၂၀၂၂ ခုနှစ်တွင် မူ WMO က ရွေးချယ်ချီးမြှင့်သည့် ကမ္ဘာ့အကောင်းဆုံး အမျိုးသမီး မွေထိုင်းကစားသမားဆု ရရှိထားသူဖြစ်ပြီး ယခုနောက်ပိုင်းနှစ်များတွင် အောင်မြင်မှုများ ဆက်တိုက်ရရှိထားခြင်းဖြစ်သည်။
