ထိုင်းအစိုးရရှေ့နေများသည် အထက်လွှတ်တော်အမတ်တဦးကို မူးယစ်မှောင်ခိုမှု၊ ငွေကြေးခဝါချမှုနှင့် နိုင်ငံဖြတ်ကျော်ရာဇဝတ်ဂိုဏ်းနှင့် ပတ်သက်မှု အပါအဝင် စွဲချက် ခြောက်ခုဖြင့် တရားစွဲဆိုလိုက်ကြောင်း ရှေ့နေချုပ်ရုံးမှ ဒီဇင်ဘာလ ၁၅ ရက်နေ့က ထုတ်ပြန်ချက်အရ သိရသည်။
အထက်လွှတ်တော်အမတ် ဥပကစ် ပါချာရီယန်ကွန်သည် ဘန်ကောက်မှ ရာဇဝတ်တရားရုံးသို့ ရောက်သောအခါ စွဲချက်များအားလုံးကို ငြင်းဆိုပြီး ဘတ်ငွေ ၁၀ သန်း (ဒေါ်လာ ၂၈၆,၀၀၀) အာမခံဖြင့် လွှတ်ထားပေးခံရသည်။
ဥပကစ်၏အမှုသည် မြန်မာစစ်ကောင်စီနှင့်၊ အထူးသဖြင့် စစ်ကောင်စီခေါင်းဆောင် မင်းအောင်လှိုင်နှင့် ရင်းနှီးသည်ဟု ကျော်ကြားသူ ထွန်းမင်းလတ်အမှုနှင့် ပတ်သက်နေသည်။ ထိုစစ်ခေါင်းဆောင်သည် ရွေးကောက်ခံ ဒေါ်အောင်ဆန်းစုကြည်အစိုးရကို ၂၀၂၁ ခုနှစ်တွင်အာဏာသိမ်းသည့် ခေါင်းဆောင်ဖြစ်သည်။
၎င်းတို့အားလုံးနှင့် ပတ်သက်သောအမှုများတွင် မူးယစ်ဆေးမှောင်ခိုလုပ်ငန်းမှ ငွေများကို ထွန်းမင်းလတ်နှင့် ဥပကစ်တို့ ထိန်းချုပ်ထားသည့် လျှပ်စစ်ဓာတ်အားကုမ္ပဏီမှတဆင့် ငွေကြေးခဝါချသည် ဆိုသည့် စွပ်စွဲချက် ပါဝင်သည်။ သို့သော် ဥပကစ်က ထိုလုပ်ငန်းမှ ၎င်း၏ ရှယ်ယာများကို သူ ၂၀၁၉ ခုနှစ်တွင် အထက်လွှတ်တော်အမတ် ဖြစ်သောအခါ ရောင်းချပြီးဖြစ်ကြောင်း ပြောသည်။
မြန်မာသည် မက်သာဖက်တမင်းကဲ့သို့သော မူးယစ်ဆေးများကို အဓိက ထုတ်လုပ်တင်ပို့သည့် နိုင်ငံဖြစ်ပြီး ထိုမူးယစ်ဆေးအများစုသည် ထိုင်းနိုင်ငံတွင်း သုံစွဲမှုနှင့် တဆင့်တင်ပို့ရန်အတွက် ဖြစ်သည်။
ဥပကစ်နှင့် ထွန်းမင်းလတ်တို့သည် မြန်မာတွင် ကာစီနိုလုပ်ငန်းတခုနှင့် ထိုင်း ဓာတ်အားပေးကုမ္ပဏီတခု အပါအဝင် ကုမ္ပဏီအများအပြားတွင် ရှယ်ယာများပိုင်ဆိုင်သည်ဟု ထိုင်းနှင့် မြန်မာ မီဒီယာများက ဖော်ပြသည်။
ထွန်းမင်းလတ်သည် မြန်မာစစ်ကောင်စီအတွက် လက်နက်ပွဲစားဖြစ်သည်ဟု မြန်မာမှ လွတ်လပ်သော မီဒီယာများနှင့် တက်ကြွလှုပ်ရှားသူအဖွဲ့များက ပြောသည်။ အမေရိကန် ပြည်ထောင်စုသည် ထွန်းမင်းလတ်၊ သူ၏ဇနီးနှင့် သူ၏ကုမ္ပဏီအများအပြားအား စစ်ကောင်စီကို ထောက်ခံမှုဖြင့် အရေးယူပိတ်ဆို့ထားသည်။ အာဏာသိမ်းခြင်းနှင့် နောက်ဆက်တွဲ အကြမ်းဖက်ဖိနှိပ်မှုများကြောင့် စစ်ကောင်စီကို အမေရိကန်ပြည်ထောင်စုက မဆက်ဆံပေ။
ထွန်းမင်းလတ်ကို မူးယစ်ဆေးမှောင်ခိုမှုနှင့် ငွေကြေးခဝါချမှုဖြင့် လွန်ခဲ့သောနှစ် စက်တင်ဘာလက ထိုင်းတွင် ဖမ်းဆီးထားသည်။ သူနှင့်အတူ အဖမ်းခံရသူများတွင် ဥပကစ်၏ သားမက် ထိုင်း-အမေရိကန် ဒီးန် ဂူတူလာ အပါအဝင် ထိုင်းနိုင်ငံသား သုံးဦး ပါဝင်သည်။ ၎င်းတို့က အပြစ်မရှိကြောင်း ယခုနှစ် ဇန်နဝါရီလတွင် ပြောသော်လည်း တရားရင်ဆိုင်ရန် ဆက်လက် ဖမ်းဆီးခံထားရသည်။
လွန်ခဲ့သောလများအတွင် ဥပကစ်၏ အိမ်အများအပြားကို ရှာဖွေစစ်ဆေးပြီး တရားမဝင် ရရှိထားသည်ဟု သံသယရှိသည့် ဘတ် သန်း ၄၀၀ (ဒေါ်လာ ၁၁ ဒသမ ၅သန်း) တန် ပိုင်ဆိုင်မှုများကို သိမ်းဆည်းထားကြောင်း ထိုင်းနိုင်ငံ မူးယစ်ဆေးထိန်းချုပ်ရေးအဖွဲ့က ကြေညာသည်။
ဥပကစ်အမှုအတွက် အထောက်အထားများကို သုံးရန် တရားရုံးက မေလ ၁၃ ရက်နေ့တွင် ချိန်းဆိုထားသည်။
