မွန်ပြည်နယ်အတွင်း ၂၀၂၃-၂၀၂၄ ခုနှစ် တက္ကသိုလ်ဝင်စာမေးပွဲ ပထမနေ့ဝင်ရောက်ဖြေသူဆို ကျောင်းသား/သူ စုစုပေါင်း ၅၇၆၇ ဦးရှိပြီး ၂၄၆ ဦး ပျက်ကွက်ခဲ့ကြောင်း ပြည်နယ်ပညာရေးမှူးရုံးထံမှ သိရသည်။
ယခုနှစ် တက္ကသိုလ်ဝင်စာမေးပွဲဝင်ရောက်ဖြေဆိုရင် စာရင်းသွင်းထားသည့် ကျောင်းသား၊ ကျောင်းသူအရေအတွက်မှာ ၆၀၁၅ ဦးရှိပြီး ယနေ့(မတ် ၁၁ ရက်) တွင် စတင်ကျင်းပခဲ့သည့် မြန်မာစာ စာမေးပွဲသို့ ဝင်ရောက်ဖြေဆိုသူပေါင်း ၅၇၆၇ ဦးရှိကာ ပျက်ကွက်သူ ၂၄၆ ဦးရှိခဲ့ကြောင်း ပြည်နယ်ပညာရေးမှူးရုံးနှင့် နီးစပ်သူတစ်ဦးက ပြောကြားသည်။
၎င်းကဆက်လက်ပြီး “မွန်ပြည်နယ်အတွင်းမှာ တစ်ချို့မြို့နယ်တွေမှာဆိုရင် စာစစ်ဌာနတစ်ခုတည်းဘဲ ထားရှိတယ်လို့သိရတယ်။ အဓိကကတော့ စာမေးပွဲဝင်ရောက်ဖြေဆိုကြတဲ့ ကျောင်းသား၊ ကျောင်းသူအရေအတွက်က နည်းသွားတယ်။ မနှစ်တုန်းကလည်း ၆၀၀၀ ဝန်းကျင်ဘဲရှိခဲ့သလို ဒီနှစ်မှာလည်း စာမေးပွဲဖြေဆို ၆၀၀၀ ဝန်းကျင်ဘဲရှိပါတယ်” ဟု ပြောကြားသည်။
စာမေးပွဲဖြေဆိုခဲ့သည့် မြို့နယ်များအလိုက် မွန်ပြည်နယ် ကျိုက်ထိုမြို့နယ်တွင်း ၄၆၁ ဦး၊ ဘီးလင်းမြို့နယ်အတွင်း ၃၉၃ ဦး၊ သထုံမြို့နယ်အတွင်း ၄၅၉ ဦးနှင့် ပေါင်မြို့နယ်အတွင်း ၄၃၀ ဦး ဝင်ရောက်ဖြေဆိုခဲ့ကြောင်း သိရသည်။
ထို့အတူ မော်လမြိုင်မြို့နယ်အတွင်း ၁၄၄၈ ဦး၊ ချောင်းဆုံမြို့နယ်အတွင်း ၄၄၇ ဦး၊ ကျိုက်မရောမြို့နယ်အတွင်း၊ ၃၀၃ ဦး၊ မုဒုံမြို့နယ်အတွင်း ၇၄၈ ဦး၊ သံဖြူဇရပ်မြို့နယ်အတွင်း ၆၂၅ ဦးနှင့် ရေးမြို့နယ်အတွင်း ၄၅၃ ဦး စုစုပေါင်း ၅၇၆၇ ဦး ဝင်ရောက်ဖြေဆိုခဲ့ကြကြောင်း သိရသည်။
၂၀၂၂-၂၀၂၃ ပညာသင်နှစ် တက္ကသိုလ်ဝင်စာမေးပွဲတွင် မွန်ပြည်နယ်အတွင်း စာမေးပွဲဝင်ရောက်ဖြေဆိုရန် စာရင်းပေးသွင်းထားသူ ကျောင်းသား၊ ကျောင်းသူ စုစုပေါင်း ၆၂၂၀ ဦးအနက်မှ မြနမာစာဖြေဆိုသည့်နေ့တွင် ၅၇၆၈ ဦး ဝင်ရောက်ဖြေဆိုခဲ့ကြောင်း ပြည်နယ်ပညာရေးမှူးရုံးထံမှ သိရသည်။
