ဖေဖော်ဝါရီလ ၂၅ ရက်က လိဂ်ဖလား (Carabao Cup) ပြိုင်ပွဲ ဗိုလ်လုပွဲတွင် လီဗာပူးလ်အသင်းအား (၀-၁)ဂိုးဖြင့် အရေးနိမ့်ပြီးနောက် ချယ်လ်ဆီးအသင်းနည်းပြ ပိုချက်တီနို၏အနာဂတ်မှာ ပိုမိုဖိအားများလာပြီး ဥရောပဝင်ခွင့်ရရှိမှုက အဆုံးအဖြတ်ပေးဖွယ်ရှိနေကြောင်း Daily Mail က ဖော်ပြခဲ့သည်။
ယင်းသတင်းတွင် ချယ်လ်ဆီးအသင်းသည် ပိုချက်တီနို၏နေရာတွင် အစားထိုးရန်အတွက် စပို့တင်းလစ္စဘွန်းအသင်းမှ ပေါ်တူဂီလူမျိုးနည်းပြ ရူဘင်အမော်ရင်မ်ကို ပစ်မှတ်ထားနေကြောင်း သိရသည်။ အသက် ၅၁ နှစ်ရှိ ပိုချက်တီနိုအနေဖြင့် ချယ်လ်ဆီးနည်းပြဘဝ ပထမဆုံးဖလားနှင့် အနီးစပ်ဆုံးအခြေအနေသို့ ရောက်ခဲ့သော်လည်း လီဗာပူးလ်အသင်းကို အချိန်ပိုဒုတိယပိုင်းတွင် ဗန်ဒိုက်သွင်းယူသည့်ခေါင်းတိုက်ဂိုးဖြင့် အရေးနိမ့်ခဲ့ခြင်းဖြစ်သည်။
ချယ်လ်ဆီးအသင်းသည် ပိုချက်တီနိုကို ပြီးခဲ့သည့်နွေရာသီက နှစ်နှစ်စာချုပ် ချုပ်ဆိုကာ တစ်နှစ်သက်တမ်းတိုးခွင့်ရှိ သည့်အချက်ကိုလည်း စာချုပ်တွင် ထည့်သွင်းထားသည်။ ပိုချက်တီနို၏အသင်းသည် လိဂ်ဖလားကို ဆုံးရှုံးလိုက်ရသော်လည်း ယခုကာ လအပိုင်းအခြားအတွင်း အသင်းစွမ်းဆောင်ရည် တိုးတက်လာနေကြောင်းလည်း မှတ်တမ်းများက ဖော်ပြခဲ့သည်။
လိဂ်ဖလားဗိုလ်လုပွဲမတိုင်မီ ချယ်လ်ဆီးအသင်းသည် ပြိုင်ပွဲစုံ အဝေးကွင်း သုံးပွဲဆက်တိုက် ကစားခဲ့ရသော်လည်း အက်စတွန်ဗီလာနှင့် ခရစ္စတယ်ပဲလေ့စ်ကို အနိုင်ကစားကာ မန်စီးတီးကို သရေကစားနိုင်ခဲ့သည်။ လက်ရှိအနေအထားများအရ ချယ်လ်ဆီးအသင်းတာဝန်ရှိသူများသည် ပိုချက်တီနိုကို ယခုရာသီအတွင်း ထုတ်ပယ်ဖွယ်မရှိဘဲ ရာသီကုန်မှသာ ပြန်လည်သုံးသပ်ဖွယ်ရှိကြောင်း သိရသည်။
ပရီးမီးယား လိဂ်မှ ထုတ်ပယ်ခံရဖွယ်ရှိသည့် နည်းပြရေပန်းစားမှုတွင် ပိုချက်တီနိုသည် ဘန်လေအသင်းနည်းပြ ကွန်ပနီ(၅း၂ လေး)၊ ထုတ်ပယ်ခံရသူမရှိ(ရး၂ လေး)နောက်တွင် ၄း၁ လေး ဖြင့် တတိယနေရာမှ ရေပန်းစားလျက်ရှိနေခြင်းဖြစ်သည်။
ချယ်လ်ဆီးအသင်းသည် အသက် ၃၉ နှစ်သာရှိသေးသူ ပေါ်တူဂီလူငယ်နည်းပြ အ မော်ရင်မ်ကို ကာလကြာရှည်ကတည်းက ပစ်မှတ်ထားနေခြင်းဖြစ်သည်။ အမော်ရင်မ် သည် လီဗာပူးလ်အသင်းနည်းပြသစ် ရေပန်းစားမှုတွင် အလွန်ဆို၏နောက် ဒုတိယနေရာမှ ရေပန်းစားနေပြီး ဘိုင်ယန်မြူးနစ်အသင်း နည်းပြဖြစ်လာနိုင်သူစာရင်းတွင်လည်း ထိပ်ဆုံး ၁၀ ဦးစာရင်းထဲ ပါဝင်လျက်ရှိကြောင်း သိရသည်။
