ချယ်လ်ဆီးတိုက်စစ်ကစားသမား စတာ လင်က မိမိတို့အသင်းအနေဖြင့် လိဂ်ဖလား ဗိုလ်လုပွဲတွင် လီဗာပူးလ်အသင်းကို ရင်ဆိုင်ရန် အသင့်ဖြစ်နေပြီဖြစ်ကြောင်း ပြောကြားခဲ့သည်။
ပရီးမီးယားလိဂ်ထိပ်သီးကလပ်အသင်းများဖြစ်သည့် ချယ်လ်ဆီးနှင့် လီဗာပူးလ်အသင်းတို့သည် ၂၀၂၃-၂၄ ရာသီ လိဂ်ဖလားဗိုလ်လုပွဲအဖြစ် ယနေ့ည (မြန်မာစံတော်ချိန် ၉း၃၀) တွင် ဝင်ဘလေကွင်း၌ ယှဉ်ပြိုင်ကစားကြမည်ဖြစ်သည်။
အသက် ၂၉ နှစ်အရွယ်ရှိ စတာလင်သည် လီဗာပူးလ်အကယ်ဒမီထွက်ဖြစ်ပြီး လီဗာပူးလ်အသင်းတွင် ပရော်ဖက်ရှင်နယ်ကစားသမားဘဝ စတင်ခဲ့သူဖြစ်သည်။ ၎င်းသည် လီဗာပူးလ်အသင်းတွင် ၂၀၁၂ ခုနှစ်မှ ၂၀၁၅ ခုနှစ်အထိ ကစားခဲ့ပြီး ၂၀၁၅ နွေရာသီတွင် မန်စီးတီးအသင်းသို့ ပြောင်းရွှေ့ကစားခဲ့သည်။ စတာလင်သည် မန်စီးတီးအသင်းတွင် ခုနစ်ရာသီကြာကစားခဲ့ပြီး ၂၀၂၂ နွေရာသီတွင် ချယ်လ်ဆီးအသင်းသို့ ရောက်ရှိလာသူဖြစ်သည်။ ၎င်းသည် ချယ်လ်ဆီးအသင်းနှင့်အတူ လိဂ်ဖလား ငါးကြိမ်အထိ ရယူဖူးပြီး ယခုအခါ ခြောက်ကြိမ်မြောက်အဖြစ် ချယ်လ်ဆီးအသင်းနှင့် ရယူရန် ပစ်မှတ်ထားနေခြင်းဖြစ်သည်။
စတာလင်က “လိဂ်ဖလားသာရခဲ့မယ်ဆိုရင် ကျွန်တော်တို့ ကြီးမားတဲ့အောင်မြင်မှု ဖြစ်လာပါလိမ့်မယ်။ ဖလားဆိုတာ ရပြီးရင် ထပ်လိုချင်တဲ့အရာမျိုးဖြစ်ပါတယ်။ လီဗာပူးလ်နဲ့ပွဲက ခက်ခဲမှာ သေချာပါတယ်။ လီဗာပူးလ်ဟာ ပြီးခဲ့တဲ့နှစ်အနည်းငယ်အတွင်း အင်္ဂလန်မှာ လွှမ်းမိုးမှုအရှိဆုံးအသင်းတွေထဲက တစ်သင်းဖြစ်ပါတယ်။ အဲဒီလိုအသင်းမျိုးနဲ့ ယှဉ်ပြိုင်ခွင့်ရတာ ကျွန်တော်တို့ စိန်ခေါ်မှုကောင်းတစ်ခုပါပဲ။ အဲဒီပွဲအတွက် ကျွန်တော်တို့ အသင့်ဖြစ်နေပါပြီ။ ဖလားရခဲ့မယ်ဆိုရင် အသင်းရဲ့ ယုံကြည်မှု မြင့်တက်လာပြီး ဖလားတွေ ပိုလိုချင်လာမှာပါ”ဟု ပြောကြားခဲ့သည်။
