မွန်ပြည်သစ်ပါတီဥက္ကဋ္ဌ နိုင်ဟံသာအား မွန်အမျိုးသားတစ်ရပ်လုံး၏ အမြင့်ဆုံးဂုဏ်ထူးဆောင်ဆုတံဆိပ်ဖြစ်သည် “ဝီရဟံသာ” ဆုတံဆိပ်ချီးမြှင့်ခဲ့ကြောင်း သိရသည်။
“ရဲစွမ်းသတ္တိရှိခြင်း၊ ဇွဲလုံ့လဝီရိယ ပြည့်ဝခြင်းနှင့် အလေးအမြတ်ပြုအပ်သော ဟင်္သာ” အဓိပ္ပာယ်ရှိသည့် “ဝီရဟံသာ” ဆု တံဆိပ်အား နိုင်ငံတကာဆက်ဆံရေးမွန်အသင်းအဖွဲ့ကြီးမှ ဦးဆောင်ကမကထပြုလုပ်၍ မွန်ပြည်သစ်ပါတီ ဗဟိုဌာနချုပ်တည်ရှိရာ ရေးချောင်းဖျားဒေသ၌ ဖေဖော်ဝါရီ ၁၅ ရက်က အခမ်းအနားက ယင်းဆုတံဆိပ်အား ချီးမြှင့်ခဲ့ခြင်းဖြစ်သည်။
ထိုအခမ်းအနားသို့ မွန်သံဃာတော်များ၊ မွန်ပြည်သစ်ပါတီမှ တာဝန်ရှိသူများ၊ စီးပွားရေးလုပ်ငန်းရှင်များ၊ မွန်ပြည်သူများနှင့် မွန်ပြည်သစ်ပါတီတပ်ဖွဲ့ဝင်များ တက်ရောက်ခဲ့ကြကြောင်း သိရသည်။
နိုင်ဟံသာသည် ၁၉၆၈ ခုနှစ် အသက် ၂၀ အရွယ်မှစတင်၍ မွန်ပြည်သစ်ပါတီသို့ ဝင်ရောက်လာပြီး ၁၉၇၁ခုနှစ်တွင် အရန်ဗဟိုကော်မတီဝင်၊ ၁၉၇၂ခုနှစ်တွင် ဗဟိုကော်မတီဝင်၊ မြို့နယ်ဥက္ကဋ္ဌ/အတွင်းရေးမှူး၊ ၁၉၇၈ ခုနှစ်တွင် ခရိုင်အတွင်းရေးမှူး၊ ၁၉၈၂ ခုနှစ်တွင် အမျိုးသားဒီမိုကရေစီတပ်ပေါင်းစု NDF အထွေထွေ အတွင်းရေးမှူးအဖြစ် ငါးနှစ်ခန့် တာဝန်ထမ်းဆောင်ခဲ့ပြီး ၁၉၈၅ ခုနှစ်တွင် မွန်ပြည်သစ်ပါတီ (နိုင်နွန်လာအဖွဲ့) ဗဟိုအလုပ်အမှုဆောင်အဖွဲ့ဝင်၊ ၁၉၈၆ ခုနှစ်တွင် မွန်ပြည်သစ်ပါတီ (နိုင်နွန်လာအဖွဲ့) တွဲဖက်အတွင်းရေးမှူး၊ ၁၉၈၈ နှစ်ကုန်ခါနီး မြန်မာပြည်ဒီမိုကရက်တစ် မဟာမိတ်အဖွဲ့ချုပ် DAB ဖွဲ့စည်းသောအခါ တွဲဖက်အတွင်းရေးမှူး၊ မွန်ပြည်သစ်ပါတီ ပြန်လည်ပေါင်းစည်း၍ ၁၉၈၉ နှစ်ကုန်ပိုင်းတွင် ကျင်းပသော မွန်ပြည်သစ်ပါတီ ပထမအကြိမ်ဗဟိုညီလာခံ၌ တွဲဖက်အတွင်းရေးမှူးနှင့် ၁၉၉၃ ခုနှစ် တွင် DAB အထွေထွေအတွင်းရေးမှူးအဖြစ် တာဝန်ထမ်းခဲ့သူတစ်ဦးဖြစ်သည်။
၁၉၉၅ ခုနှစ် ဇွန် ၂၉ ရက်တွင် နဝတနှင့် မွန်ပြည်သစ်ပါတီ အပစ်အခတ်ရပ်စဲမှု သဘောတူညီလိုက်သဖြင့် မွန်ပြည်သစ်ပါတီမှာ DAB မှခဲ့ရကြောင်း သိရသည်။
၁၉၉၇ ခုနှစ် မယ်သရောထာ စာချုပ်တွင် ပါဝင်လက်မှတ်ရေးထိုးခဲ့သည့်အတွက် မွန်ပြည်သစ်ပါတီတွဲဖက်အတွင်းရေးမှူးနှင့် ဗဟိုအလုပ်အမှုဆောင်အဖြစ်မှ ဗဟိုကော်မတီဝင်အဖြစ်သို့ တစ်နှစ်တိတိ တာဝန်တစ်ဆင့် လျှော့ချဆိုင်းငံ့ခံခဲ့ရပြီး ၂၀၀၀ ခုနှစ် စတုတ္ထအကြိမ် မွန်ပြည်သစ်ပါတီဗဟိုညီလာခံမှ ပါတီတွဲဖက်အတွင်းရေးမှူး ပြန်လည်ရွေးချယ်ခံခဲ့ရကြောင်း၊ ၂၀၀၃ ခုနှစ်တွင် မွန်ပြည်သစ်ပါတီဥက္ကဋ္ဌ နိုင်ရွှေကျင်ကွယ်လွန်ပြီး မွန်ပြည်သစ်ပါတီ အထွေထွေအတွင်းရေးမှူး အဖြစ်လည်းကောင်း၊ ၂၀၁၁ ခုနှစ်တွင် ညီညွတ်သော တိုင်းရင်းသားလူမျိုးများ ဖက်ဒရယ်ကောင်စီ UNFC အထွေထွေအတွင်း ရေးမှူးအဖြစ်လည်းကောင်း၊ နောက်ပိုင်းတွင် ဒုဥက္ကဋ္ဌဖြစ်လာပြီး၂၀၁၇ ခုနှစ်တွင် ဥက္ကဋ္ဌဖြစ်လာခဲ့သူဖြစ်သည်။
၂၀၁၉ ခုနှစ်တွင်ကျင်းပသည့် မွန်ပြည်သစ်ပါတီ (၁၀)ကြိမ်မြောက်ညီလာခံ၌ မွန်ပြည်သစ်ပါတီဥက္ကဋ္ဌဖြစ်လာကာ အသက် ၇၆ နှစ်ကျော်အရွယ်တွင် ကျန်းမာစွာဖြင့် ယနေ့တိုင်တာဝန်ထမ်းဆောင်လျက်ရှိကြောင်း သိရသည်။
အဆိုပါ “ဝီရဟံသာ” ဆုတံဆိပ်အား ၂၀၂၁ ခုနှစ်က ယခင်မွန်ပြည်သစ်ပါတီ၏ ဂုဏ်ထူးဆောင် ဥက္ကဋ္ဌဟောင်းဖြစ်သူ နိုင်ထောမွန်အား ပထမဆုံးချီးမြှင့်ခဲ့ပြီး ၂၀၂၄ ခုနှစ်တွင် နိုင်ဟံသာအား ဒုတိယမြောက် ချီးမြှင့်ဂုဏ်ပြုခဲ့ခြင်းဖြစ်ကြောင်း သိရသည်။
