အတွဲလိုက် ဒုံးပစ်လောင်ချာထိန်းချုပ်မှု စနစ်သစ်ကို အောင်မြင်စွာတီထွင်နိုင်ခဲ့ကြောင်း မြောက်ကိုရီးယားက ဖေဖော်ဝါရီ ၁၂ ရက်တွင် ပြောကြားခဲ့ပြီး ယင်းသည် ကာကွယ်ရေးစွမ်းရည်ဆိုင်ရာ အရည်အသွေးကို အပြောင်းအလဲဖြစ်စေမည်ဖြစ်ကြောင်း မြောက်ကိုရီးယားက ပြောကြားသည်။
မြောက်ကိုရီးယား၏ ကာကွယ်ရေးသိပ္ပံအကယ်ဒမီသည် ပြောင်းအချင်း ၂၄၀ မမရှိသည့် အတွဲလိုက် ဒုံးပစ်လောင်ချာ၏ ပစ်ခတ်ထိန်းချုပ်မှုစနစ်ကို ဖေဖော်ဝါရီ ၁၀ ရက်က အောင်မြင်စွာစမ်းသပ်နိုင်ခဲ့ကြောင်း နိုင်ငံပိုင် KCNA သတင်းဌာနက ဖော်ပြခဲ့သည်။
ယင်းဒုံးပစ်လောင်ချာအသစ်ကို ပြန်လည်အကဲဖြတ်မှုများ လုပ်ဆောင်မည်ဖြစ်ပြီး စစ်မြေပြင်တွင် ၎င်း၏အခန်းကဏ္ဍကို တိုးမြှင့်နိုင်မည်ဖြစ်ကြောင်း KCNA က ဆိုသည်။
ပြီးခဲ့သည့် ဇန်နဝါရီလတွင် မြောက်ကိုရီးယားက တောင်ကိုရီးယားကို ၎င်းတို့၏ အဓိကရန်သူအဖြစ် သတ်မှတ်ကြေညာခဲ့ပြီးပြန်လည်ပေါင်းစည်းရေးအတွက် ရည်ရွယ်၍ ဖွဲ့စည်းထားသည့်ဌာနများကိုလည်း ဖျက်သိမ်းကာ စစ်ဖြစ်လာလျှင် တောင်ကိုရီးယားကို သိမ်းပိုက်မည်ဟု ခြိမ်းခြောက်ခဲ့သည်။
ဖေဖော်ဝါရီ ၉ ရက်ကလည်း မြောက်ကိုရီးယားခေါင်းဆောင် ကင်ဂျုံအွန်က ၎င်းတို့ တိုက်ခိုက်ခံရမည်ဆိုလျှင် တောင်ကိုရီးယားကို အဆုံးအထိချေမှုန်းရန် တုံ့ဆိုင်းနေမည်မဟုတ်ဟု ထပ်လောင်းပြောကြားခဲ့ပြီး တောင် ကိုရီးယားသည် မိမိတို့အတွက် အန္တရာယ်အရှိဆုံးနှင့် နံပါတ်တစ်ရန်ဘက်နိုင်ငံဖြစ်ကာ ထာဝရ ရန်သူဖြစ်သည်ဟုလည်း ၎င်းကပြောကြားခဲ့သည်။
ယခုနှစ် ဇန်နဝါရီလတွင် မြောက်ကိုရီးယားသည် တောင်ကိုရီးယား၏ နယ်စပ်ကျွန်းများအနီးသို့ လက်နက်ကြီးကျည်များဖြင့် တရစပ် ပစ်ခတ်ခဲ့သည်။ ထို့အတွက်ကြောင့် တောင်ကိုရီးယားက ကျည်အစစ်သုံးသည့်စစ်ရေးလေ့ကျင့်မှုများ တန်ပြန်ပြုလုပ်ကာ ဒေသခံများကိုလည်း ဘေးလွတ်ရာရွှေ့ပြောင်းရန် ညွှန်ကြားခဲ့ရသည်။
ကင်သည် ယခုနှစ်တွင် ခရုစ်ဒုံးကျည် စမ်းသပ်မှုများကို ဆက်တိုက်လုပ်ဆောင်ခြင်း အပါအဝင် လက်နက်စမ်းသပ်မှုများကို အရှိန်မြှင့်ခဲ့သည်။ မြောက်ကိုရီးယားသည် ယူကရိန်းကို စစ်ဆင်နွှဲနေသည့် ရုရှာအတွက် လက်နက်ခဲယမ်းများ ပေးပို့နေဖွယ်ရှိသည်ဟု လေ့လာသုံးသပ်သူများက ဆိုသည်။
တောင်ကိုရီးယားသမ္မတ ယွန်းဆော့ယိုကလည်း မြောက်ကိုရီးယားဘက်က စတင်တိုက်ခိုက်မည်ဆိုလျှင် ပြင်းပြင်းထန်ထန် တုံ့ပြန်မည်ဟု အခိုင်အမာပြောဆိုထားပြီး မြောက်ကိုရီးယားကရန်စလျှင် အရင်တုံ့ပြန်ပြီးမှ သတင်းပို့ရန် ၎င်း၏စစ်တပ်ကို ညွှန်ကြားထားသည်။
မြောက်ကိုရီးယားက ၎င်းတို့၏လက်နက်တီထွင်ထုတ်လုပ်မှု အစီအစဉ်ကို အရှိန်မြင့်တင်ခဲ့ပြီး တောင်ကိုရီးယားကလည်း အမေရိကန်၊ ဂျပန်တို့နှင့် စစ်ရေးပူးပေါင်းဆောင်ရွက်မှုများ တိုးမြှင့်ခဲ့ပြီးနောက် ကိုရီးယားနှစ်နိုင်ငံ ဆက်ဆံရေးသည် အကြီးအကျယ် ယိုယွင်းလာခဲ့ပြီး နှစ်နိုင်ငံစီးပွားရေးပူးပေါင်း ဆောင်ရွက်မှုဆိုင်ရာ စီမံကိန်းများကိုလည်းရပ်ဆိုင်းခဲ့သည်။
တောင်ကိုရီးယားနှင့် စီးပွားရေးပူးပေါင်းဆောင်ရွက်မှုဆိုင်ရာ ဥပဒေများကို ဖျက်သိမ်းရန် မြောက်ကိုရီးယားလွှတ်တော်က မကြာသေးမီကမဲခွဲဆုံးဖြတ်ခဲ့သည်။ အိမ်နီးချင်းနှစ်နိုင်ငံဆက်ဆံရေးသည် အနိမ့်ဆုံးအခြေအနေသို့ ရောက်ရှိနေသည်။
