ရန်ကုန်တွင် စက်သုံးဆီစျေးနှုန်း ၉၂ တစ်လီတာလျှင် ကျပ် ၆၀ ထပ်မံမြင့်တက်ခဲ့ပြီး ၉၂ တစ်လီတာ ၂၇၆၅ ကျပ်သို့ ရောက်ရှိလာကြောင်း စက်သုံးဆီတင်သွင်းသိုလှောင်ဖြန့်ဖြူးခြင်းလုပ်ငန်း ကြီးကြပ်ရေးကော်မတီက ထုတ်ပြန်သည်။
ဖေဖော်ဝါရီ ၂ ရက်တွင် စက်သုံးဆီတင်သွင်းသိုလှောင်ဖြန့်ဖြူးခြင်းလုပ်ငန်းကြီးကြပ်ရေးကော်မတီ၏ စျေးနှုန်းများအရ ၉၂ တစ်လီတာလျှင် ၂၇၆၅ ကျပ်၊ ၉၅ တစ်လီတာလျှင် ၂၈၉၀ ကျပ်၊ ရိုးရိုးဒီဇယ်တစ်လီတာလျှင် ကျပ် ၂၅၅၅၊ ပရီမီယံဒီဇယ်တစ်လီတာလျှင် ၂၆၀၀ ကျပ်ဖြစ်ကြောင်း သိရသည်။
စက်သုံးဆီစျေးနှုန်းမှာ ဇန်နဝါရီ ၂၆ ရက်တွင် စတင်ပြောင်းလဲခဲ့ပြီး ၉၂ တစ်လီတာလျှင် ကျပ် ၂၇၀၀ ကျော်သို့ စတင်ရောက်ရှိလာခဲ့ခြင်းဖြစ်သည်။
ဇန်နဝါရီ ၂၆ ရက်တွင် ထုတ်ပြန်သည့် စျေးနှုန်းများအရ ၉၂ တစ်လီတာလျှင် ၂၇၀၅ ကျပ်၊ ၉၅ တစ်လီတာလျှင် ၂၈၄၅ ကျပ်၊ ရိုးရိုးဒီဇယ်တစ်လီတာလျှင် ကျပ် ၂၄၅၀၊ ပရီမီယံ ဒီဇယ်တစ်လီတာလျှင် ၂၅၁၅ ကျပ်ဖြစ်ကြောင်း သိရသည်။
ယင်းစျေးနှုန်းများမှာ ပြီးခဲ့သည့်ရက်ပိုင်းများတွင် ငြိမ်သက်နေရာမှ ဖေဖော်ဝါရီ ၂ ရက်တွင် စျေးနှုန်းများ ထပ်မံမြင့်တက်လာခဲ့ခြင်းဖြစ်သည်။
ဇန်နဝါရီ ၂၆ ရက် မတိုင်မီက စျေးကွက်အတွင်း ရောင်းချသည့်စျေးနှုန်းများအနေဖြင့် ၉၂ တစ်လီတာလျှင် ၂၅၈၅ ကျပ်၊ ၉၅ တစ်လီတာလျှင် ကျပ် ၂၇၂၀၊ ရိုးရိုးဒီဇယ် တစ်လီတာလျှင် ကျပ် ၂၄၃၀၊ ပရီမီယံဒီဇယ်တစ်လီတာလျှင် ၂၄၉၅ ကျပ်ဖြစ်သည်။
ထို့ကြောင့် တပတ်ကျော်ကာလအတွင်း ၉၂ တစ်လီတာလျှင် ကျပ် ၁၈၀ ကျော် မြင့်တက်ခဲ့ခြင်းဖြစ်သည်။
စက်သုံးဆီစျေးနှုန်းများ မြင့်တက်ရခြင်းသည် စင်ကာပူ စက်သုံးဆီစျေးနှုန်းများမြင့် တက်လာခြင်းကြောင့်ဖြစ်သည်ဟု စျေးကွက်အတွင်းမှ သိရသည်။
စက်သုံးဆီစျေးနှုန်းများ မြင့်တက်ခဲ့သော်လည်း ရန်ကုန်မြို့ရှိ စက်သုံးဆီဆိုင်များတွင် တန်းစီဝယ်ယူရခြင်းများ မရှိကြောင်း မော်တော်ယာဉ်အငှားမောင်းသူများထံမှ သိရသည်။
“စျေးတက်ပေမဲ့ တန်းစီဝယ်ရတာတော့ မရှိဘူး။ တချို့ဆိုင်တွေမှာက ဘေးတွဲတွေကို အချိန်သတ်မှတ်ပြီး ရောင်းပေးတာပဲရှိတယ်။ မော်တော်ယာဉ်တွေကတော့ အချိန်သတ်မှတ် ချက်မရှိသလို တန်းစီရတာလည်းမရှိဘူး” ဟု ယာဉ်အငှားမောင်းနှင်သူတစ်ဦးက ပြောကြားသည်။
၂၀၂၃ ခုနှစ် နှစ်ကုန်ပိုင်းတွင် ရန်ကုန်မြို့ရှိ စက်သုံးဆီအရောင်းဆိုင်များတွင် မော်တော်ယာဉ်များ စက်သုံးဆီဝယ်ယူရန် တန်းစီခဲ့ရသည့်ဖြစ်စဉ်များ ဖြစ်ပွားခဲ့သည်။
ယင်းကာလအတွင်း CNG တပ်ဆင်ထားသည့် မော်တော်ယာဉ်များကို စက်သုံးဆီဝယ်ယူခွင့်မပြုကြောင်း စက်သုံးဆီဆိုင်များတွင် တားမြစ်ကြေညာခဲ့သည်ကို တွေ့ရသည်။
