အချိန်အခါမဟုတ် မိုးရွာသွန်းမှုကြောင့် မွန်ပြည်နယ် သံဖြူဇရပ်မြို့နယ်အတွင်းရှိ ဆားကွင်းများ ထိခိုက်ပျက်စီးမှုများရှိခဲ့ကြောင်း ဆားတောင်သူများ၏ ပြောကြားချက်များအရ သိရသည်။
သံဖြူဇရပ်မြို့နယ်အတွင်း ဇန်နဝါရီ ၂၆ ရက်မှစတင်ကာ မိုးရွာသွန်းမှုများရှိခဲ့သည့်အပြင် နေရောင်လည်းမရကြောင်း ဇန်နဝါရီ ၂၉ ရက် နံနက်ပိုင်းတွင်လည်း မိုးရွာသွန်းမှုများရှိကြောင်း သံဖြူဇရပ်မြို့နယ် ပငကျေးရွာမှ ဆားတောင်သူတစ်ဦးဖြစ်သူ နိုင်ဟုက ပြောကြားသည်။
၎င်းက ဆက်လက်ပြီး “ထိခိုက်ပျက်စီးမှုအနေနဲ့က မိုးကသည်းသည်းမရွာတော့ ကွင်းတွေ ပျက်စီးတာမျိုးတော့မရှိဘူး။ ဒါပေမဲ့ ဆားက နေရောင်ခြည်လည်းမရ၊ ဆားကွင်းတွေကလည်း စိုကုန်တော့ ကွင်းထဲက ဆားတွေလည်း အရည်ပျော်ကုန်တယ်။ အဲဒီတော့ ဆားအထွက်နောက်ကျသွားမယ်။ လတ်တလောမှာ ဆားမထွက်တော့တဲ့အတွက်ကြောင့် အလုပ်သမားစရိတ်နဲ့ စက်သုံးဆီစရိတ်တွေက လျော့လို့မရတော့ ဆားက ရက်သတ္တတစ်ပတ်လောက် မထွက်ဘူးဆိုရင် ကုန်ကျစရိတ်ကို ကိုယ့်အိတ်ထဲကနေ စိုက်ရတယ်။ အဲဒီတော့ ကုန်ကျစရိတ်တွေ ပိုများသွားတာပေါ့ဗျာ” ဟု ပြောကြားသည်။
လတ်တလောတွင် ဆားကြမ်းတစ်ပိဿာလျှင် ကျပ် ၁၇၀ ဝန်းကျင် ပေါက်စျေးရှိသော်လည်း ဆားတောင်သူများထံတွင် ဆားလက်ကျန်မရှိတော့သည့်အတွက် ဆားကြမ်းအရောင်းအဝယ်စျေးကွက် အေးနေကြောင်းလည်း ဆားတောင်သူများက ဆိုသည်။
“ပုံမှန်ရာသီဆိုရင် အခုအချိန်က ဆားအထွက်ကောင်းတဲ့အချိန်ပဲ။ ဒါပေမဲ့ ဒီရက်ပိုင်း မိုးထိတော့ ဆားတွေရော ဆားကွင်းတွေပါ အကုန်ပျက်စီးကုန်တယ်။ ဒီနေ့လည်း နေရောင်က မရသေးဘူး။ မိုးမရွာတော့မှဘဲ ဆားကွင်းတွေ ပြန်ပြုပြင်ရတော့မယ်” ဟု သံ ဖြူဇရပ်မြို့နယ် ကရုပ္ပိကျေးရွာမှ ဆားတောင်သူတစ်ဦးက ပြောကြားသည်။
၎င်းက ဆက်လက်ပြီး “မိုးရွာလို့ ဆားကွင်းတွေ၊ ဆားတွေပျက်စီးသွားတော့ ထိခိုက်မှုတွေ အများကြီးရှိပါတယ်။ အဲဒီအပြင်ကို ဆားကလည်း မထွက်ဘူး။ အလုပ်သမားစရိတ်နဲ့ စက်သုံးဆီသုံးစွဲမှုစရိတ်က လျှော့လို့မရတော့ ထိခိုက်မှုတွေ ပိုများသွားတယ်” ဟု ပြောကြားသည်။
အနောက်ဘက်မှ ရွေ့လျားလာသော လေပွေလှိုင်းများကြောင့်လည်းကောင်း၊ ကပ္ပလီပင်လယ်ပြင်နှင့် ဘင်္ဂလားပင်လယ်အော်တို့မှ လေနွေးများနှင့် တရုတ်ပြည်မကြီးပေါ်ရှိ လေဖိအားကြီးရပ်ဝန်းဒေသမှ ရွေ့လျားလာသော လေအေးများ တွေ့ဆုံမှုကြောင့် မြန်မာနိုင်ငံအနှံ့အပြား၌ မိုးထစ်ချုပ်ရွာနိုင်ကြောင်း မိုးလေဝသနှင့် ဇလဗေဒညွှန်ကြားမှုဦးစီးဌာနက ပြီးခဲ့သည့် ဇန်နဝါရီ ၂၅ ရက်က သတင်းထုတ်ပြန်ထားသည်။
ထိုအခြေအနေကြောင့် ဇန်နဝါရီ ၂၆ ရက်မှစတင်ကာ သံဖြူဇရပ်မြို့နယ်အပါအဝင် မွန်ပြည်နယ်အနှံ့တွင် အချိန်အခါမဟုတ် မိုးရွာသွန်းမှုများဖြစ်ပေါ်ခဲ့ကြောင်း သိရသည်။
နေလှန်းဆားကို မွန်ပြည်နယ် သံဖြူဇရပ်မြို့နယ်အတွင်း ပငကျေးရွာအပြင် ကျိုက္ခမီ၊ စက်စဲနှင့် ဝဲကလောင်းကျေးရွာတို့တွင်လည်း ဆားလုပ်ငန်းများ လုပ်ကိုင်လျက်ရှိကြောင်း၊ ထို့ပြင် ရေးမြို့နယ်နှင့် ပေါင်မြို့နယ်များတွင်လည်း နေလှန်းဆားလုပ်ငန်းများရှိကြောင်း သိရသည်။
နေလှန်းဆားကွင်းများ ထိခိုက်ပျက်စီးမှုများရှိခဲ့သည့်အပြင် နေရောင်မရသည့်အတွက် ဆားများ အရည်ပျော်ပျက်စီးမှုများလည်း ရှိခဲ့ကြောင်း သိရသည်။
