မန္တလေးတိုင်းရှိ မြို့နယ် ၁၃ မြို့နယ်မှ တောင်သူများအား ဆောင်းသီးနှံချေးငွေထုတ်ချေးပေးရန် ကျပ် သန်းပေါင်း ၄၀၀၀ ကျော် ထုတ်ချေးပေးရန်လျာထားပြီး တောင်သူများအား စတင်ထုတ်ချေးပေးနေကာ လက်ရှိအချိန်အထိ ကျပ်သန်း ၁၄၅၂ ဒသမ ၈၀ ကို ထုတ်ချေးပေးထားပြီး ဆက်လက်ထုတ်ချေးနေသည်ဟု မန္တလေးတိုင်းဒေသကြီး မြန်မာ့လယ်ယာဖွံ့ဖြိုးရေးဘဏ်ခွဲမှ သိရသည်။
“မန္တလေးတိုင်းဒေသကြီးရှိ တောင်သူများအား ၂၀၁၉ ခုနှစ် ဆောင်းသီးနှံချေးငွေထုတ်ချေးပေးမှုမှာ ၁၉ ဒသမ ၈၂ ဘီလျံသာ ထုတ်ချေးပေးခဲ့ပြီး ၂၀၂ဝခုနှစ် ဆောင်းချေးငွေကို ၂၀ ဒသမ ၀၄၄ ဘီလျံ ထုတ်ချေးပေး ခဲ့ကြောင်း၊ ၂၀၂၂ ဆောင်းချေးငွေကို ၇၅၆ ဒသမ ၆၀ ကျပ်သန်း ထုတ်ချေးခဲ့ကြောင်း၊ ယခုနှစ်တွင် ၂၀၂၃ ဆောင်းသီးနှံချေးငွေကို ကျပ်သန်း ၄၀၀၀ ကျော် လျာထားပြီး ကျပ်သန်း ၂၀၀၀ က ထုတ်ချေးပေးဖို့အတွက် ခွင့်ပြုချက်ရရှိထားပြီး ချေးငွေလိုအပ်ချက်ရှိပါက ထပ်မံ၍ ခွင့်ပြုချက်ရယူသွားမည်” ဟု မန္တလေးတိုင်းဒေသကြီး မြန်မာ့လယ်ယာဖွံ့ဖြိုးရေးဘဏ်ခွဲမှ တိုင်းဒေသကြီး မန်နေဂျာ ဦးစိုးကိုကိုဝင်းက ပြောကြားသည်။
“ဆောင်းချေးငွေကို တောင်သူတွေ အဆင်ပြေအောင်လို့ ချေးငွေကာလကို နောက်ထပ်တစ်လ ထပ်တိုး ထားပါတယ်။ မန္တလေးတိုင်းဒေသကြီး မြန်မာလယ်ယာဖွံ့ဖြိုး ရေးဘဏ်အနေနဲ့ ယနေ့ ၂၉ရက်နေ့အထိ စိုက်ပျိုးစရိတ်ချေးငွေကို ကျေးရွာပေါင်း ၁၁၄ ရွာရှိ တောင်သူဦးရေ ၃၂၆၈ ဦးရဲ့ စိုက်ပျိုးဧကပေါင်း ၁၄၁၆၅ ဧက အတွက်ကို ကျပ်သန်းပေါင်း ၁၄၅၂ ဒသမ ၈၀ ကျပ်သန်းကို ထုတ်ချေးပြီးဖြစ်ပါတယ်။ ပထမ လျာထားချက်အနေနဲ့ ချေးငွေနောက်ဆုံး ထုတ်ချေးပေးသည့်ရက်က ဒီဇင်ဘာလ လကုန်အထိ သတ်မှတ်ထားပါတယ်။ သို့သော် လက်ရှိဖြစ်ပေါ်နေတဲ့ သွားလာရခက်ခဲတဲ့အခြေအနေတို့ကို ငဲ့ကွက်သော ကြောင့် ၂၀၂၃ ဆောင်းချေးငွေကာလကို ၂၀၂၄ ခုနစ် ဇန်နဝါရီလကုန်အထိ သက်တမ်းတိုးထားပြီး ထုတ်ချေးပေးသွားမှာပါ။ တောင်သူများအနေနဲ့ မိမိတို့၏စိုက်စရိတ်ချေးငွေများကိုအချိန်မီထုတ်ချေးကြဖို့ ပြောကြားလိုပါတယ်” ဟု မြန်မာ့လယ်ယာဖွံ့ဖြိုးရေးဘဏ်ခွဲမှ တိုင်းဒေသကြီး မန်နေဂျာ ဦးစိုးကိုကိုဝင်းက ပြောကြားသည်။
မန္တလေးတိုင်းဒေသကြီး မြန်မာ့လယ်ယာဖွံ့ဖြိုးရေးဘဏ်ခွဲ အနေဖြင့် ဆောင်းချေးငွေကို ၂၀၂၃ အောက်တိုဘာ ၉ ရက်နေ့ ကနေ ၂၀၂၃ ဒီဇင်ဘာလ လကုန်အထိ ထုတ်ချေးပေးရန်ယခင်က ကာလသတ်မှတ်ထားကြောင်၊း ယခုအခါ တောင်သူများ အဆင်ပြေစေရန် တစ်လ ထပ်တိုးပြီး ချေးငွေများ ထုတ်ချေးပေးနေကြောင်း၊ စိုက်ပျိုးချေးငွေပေးရာတွင် စပါးတဧကကို ကျပ် ၁၅၀၀၀၀ နှုန်း၊ မြေပဲ၊ ပဲတီစိမ်း၊ နှမ်းဝါ၊ ကုလားပဲ၊ မတ်ပဲ၊ ပြောင်း စသည့် အခြားသီးနှံများအတွက် တစ်ဧကလျှင် ကျပ် ၁၀၀၀၀၀ နှုန်းဖြင့် ထုတ်ချေးပေးနေကြောင်း သိရသည်။
